I.
Metung yang pamagmasusi king matutus a kapurian
ining bulan a mitakda, para karing kababaynan
king karelang sakripisyu’t maging ambag king balayan
ampon responsibilad king pago ra makapatan
dinian dong pamikatagun king kekatamung lipunan
ban kilalanan tibusbus ing karelang kadakilan
king miyaliwang aspetu ning sektor dang kikimutan
kilub dang pibale-bale o serbisyu publiku man
II.
king banal a kasulatan malino masasambitla
a dening wangis nang Adan makapaygit la upaya
kumpara karing babai, a linto mu king masala
a king tagyang ding lalaki tikmus na ning Mayupaya
dapot king batas ning tau iti binayu reng bigla
ding lalaki at babai mipapante no upaya
at maging king karapatan ala nong pamiyaliwa
king kagiwan ding babai dakal no ring magtiwala
III
King aspetung pulitika ginusal no ring babai
anti kang Cory Aquino a megi tang presidenti
dakal la ring linto biyasa a larinu king debati
ampo pa ring matenakan a mangayap dumiskarti
mabilug a unibersu tatalangan da no ngeni
kagiwan ding kababaynan a kalupa ring lalaki
anti mo king bansang State ding karelang US Army
babai no ring kapitna king kabilangan da reti
IV.
Manibatan king mauli nung papunta ka REGION 2
dakal na la ring babaing mitagurian pulitiku
pablasang bisa la namang king balen da magserbisyu
inia agiang babai la o retang kinandidatu
neng mas malambut la pusu pibuburian do ring tau
bandal no karing lalaking manungkulan a sangganu
inia naman ding babai karas kaniang pamagbotu
malagad lang masasambut ila ring lalto llamadu
V.
Maging king pamagserbisyu king dane ring kapulisan
dakal na la ring babaing mangatas a katungkulan
ing obra ra ring lalaki agagawa ra na naman
at maragul ayayambag para king kapanyulungan
makyabe tang magmasusi king bulan ding kababaynan
ipagkalub ta karela ing masampat a kapurian
ding babai larawan do ring indu tamung ibatan
inia marapat mung deti kekata lang pakamalan
