BALEN, nanung keka a kakung asuyu
Ngening ining beluan king bie ku dimut mu?
Akung e mikalmang mekilala lagiu,
Obra mu king dayat ing kakung abalu;
Karin a ing balang pawas kung tinulu
Ding meging bunga ra binutil lang gintu
A e por gramu at iti por kilu mu,
At mas mal la pa reng por takal a susu.
King nanung bage ku mekasuyu keka
Kanitang mandaywan kung mekipagobra?
Aku, a miwale king kakung pamilya,
Menasa, sulat man kaku alang dagpa;
Karin, a ing balang aldo kung pibata
Karing aduang palad asasalat ku pa
Bakas ing ginogo kung balas at graba
Libutad disyertu ning bansang Arabia.
Aku, a mababa mu pin pegaralan
At e tais dila king Salita nang Sam,
A’yantimo ring ken mapad mibadbaran
Makananu ing ken makitalamitam?
Karin, a nung nu’la reti mitalandang
Ding keta ngana ping Dr. Rizal
A migit e palak king malansang asan
Antining king keka ala lang pakamal.
Aku, nang maliaring keka idake ku
Ngening aku e ku meging galame mu?
A’yanti mo pin ding mangarangang tau
A tipa-manik mu ken king Kapitolyu!
At akung e man pin mipanik Kongreso
O Senado nanung bage agawa ku,
Karin a ing balang kimut da ring lilu,
Pasakit mu keka’t karing memalen mu?
At nanung maliaring isuyung aliwa
Ban akalag na ka panga-tanikala,
Ning anti kanakung megaral ku pin sa’
Pero mebiasa kung sinulat, memasa.
Nung nu’ insanu ring pantas a mesabi
Karing kekang supling ilang linto bwitre
At dit’man ken alang malasakit pati
A nung makananu ra kang yangat deti.
Aku, a metung mung kawal king paniulat
Balen, makasadia kaming lubus gunyat
Ikaming anak mu ban ing mapapanat
Tamung Sabing mana akwa nang mamutat.
Kapamilatan ning bayung teknolohiya
Kapalit ding ngeni e na makinilya,
Nu’ne computer at deti ‘gadget’ nala,
A nu’ ing susulat pin mas mabilis na.
Inya uli niti, aku bilang metung
King salitang mana (a kakung keragul,)
Yan migit king sadya tamung pamangambul,
Malalagua ta’neng miuman apalabung!
