(Iting kawatasan malugud keng yampang
karing matagumpe migyari king nasang
pakirasan king bie a kalang-alangnan
at e sukat apusan ding kasalukuyan
a magdulap king bie a kagalang-galang
at ikarangal ding pengaring ibatan).
NUNG semasan ku sa’
ing kakung sarili at e migpabaya
king pamagaral ku,
kanitang ing bili magkolehiyo na sa’,
mekad nung e ku man
Inhinyero ngeni a kapad dang bina
ding kakung pengari,
a’yala na yatang kabas king ganaka,
mekad metung na ku
karing pekatanyag a Talapamingua
ding pakakalulu,
laban king mabanding mapanalipusta.
O nung ali kaya,
pihung medisina ing kakung ayari,
a metung mu naman
karing propesyun a parehu rang buri;
At uling karela
mas matimbang kesa king krus ning salapi,
ing karing salunan,
makapanulu ku king maskup dang bili,
makusuelu na la
at alang nanu mang panayan a sukli;
Makanian kasampat
ing kaku pignasan dang maging taguri.
Sayang… mipabusten,
lesak ning kelan kung malasakit ganap
king tagimpan deti.,
a maging metung kung mapuri rang anak;
Uling nung e ku sa’
meging suwail, saka miniayang mung oras
king kelan masabal
ampon interes king karelang paninap,
at nung kenu-kenu
mekipagbarkada’t kinawe king alak,
alang sangkan e ku
king Campus ning U.P. makalmang dinalpak;
Nung nu’ ing talindo
ding kaku pengari metupad sana ngan,
at mekilala ku
lagyu king taguri a kalang-alangnan;
At e na kalupa
ning kaku yaus da ngeni ring keraklan:
“Oyan i kalasing,
makasingku litrus ne namang pihu yan,
anya sunde-sape
ne namang maglakad libutad ning dalan!”
Makanian kasalpak
ing bunga ning bigung paninap nang Inang!
(Inya ikayung ken,
ngeni salukuyan pang pigagastusan
ding kekong pengari,
king pamagaral yu – e ye pakiapusan
Iting istudyante
a kalamnan niting kakung kawatasan,
ban king aldo bukas
mie kayung mapuri at kagalang-galang,
at e anti ining
miniayang mung kualta keng katarantaduan;
Inia nanu’t e ing
paninap da para kaya e maging makanian?
