Bayung Suli (tagimpan ding poetang Kapampangan)

1.
Linsut no ding bayung suling, kapanayan ding poeta’
poeta ning indung balen, a malugud king kultura’
kulturang e mekalingwan, a kabang bie liguran da’
liguran dang alang sawa, maging ining sabing mana’
2.
Manang sabing pagnasan ta’ng, lumabung at mamutaktak
mamutaktak karing bunga, a pamana karing anak
anak na ning lalawigan, ban karas ning aldo bukas
bukas ila naman deting, king amanu munye lingap
3.
Lingap a megi nang dalan, ning pagnasan ta’ng tagumpe
tagumpe da ring makudta, king amanu rang sinese
sinese rang mipnung lugud, king pusu ra medalise
dalise king kapalsintang, kapilan man e na mate
4
Kamatayan e sumbagal, ban matda ing kapagnasan
kapagnasan ding mapuri, a poetang kapampangan
kapampangan, kabang ating, sisibul a kayanakan
kayanakan a lumingap, king amanung kekeng lakwan
5
Lakwan mila ding kekaming, kawatasan a kinudta
kinudta at ginale mi, karing bandi mung katayâ
katayang ke’keng sinimpan, at gimbulan kariing diwâ
diwang gintu ning amanu ban iyapse da ring dila