PASKU’t bayung banua payapang milabas
King alang nanu mang bage e masampat,
Subali king atin pa muring misalbag
A taliri karing kepakbungan gamat
Kareng rebentador a e na talaga
Yata alisian ken alus banua-banua
Ding aliwang tau king agyang balu ra
Ing ala lang akua nun’e mu disgrasya
Karing anti karen a’yalang masanting
A ibunga uling kaplas balat mupin
Kabud karing gamat deti aksidenting
Mikaluku ya at bigla nang memaksing!
Den e ta’la dapat pag-aksayan pera
Lalu ngening mitas ing eganagana
Ning presyo ning sabla, ot saliwan ta’ya
Ing alang masanting king bie ta’ ibunga na?
At alang matinu mu namang asapat
Nun’e kapututan taliri king gamat,
Kapalit ning akbung a makapangaklak
At pagumpisan ning maragul a silab,
Kabang ding gagawa kareting papakbung
Panatag la’t e man bitasa sigurung
Makokonsensya keng klasi ning komersyung
Manakitan la sa’ pilit dang susulung
Ing pamangawa ra karing makabawal
A rebentador a inaus dang bawang,
Sinturan nang Judas, plapla’t aliwa pang
Klasing papakbung a binang mangasikan.
Deti ila ring ken manimuna dapat
Mamintu king nanung sukat ipatupad,
Oneng ing masulit ila ring lalabag,
Karing panuntunan a saligang batas.
Inya nung itamu ing kutnan inggil ken
Antini ing sukat gawan tamu karen,
Ninu mang marakap labag utus balen,
‘Lifetime suspension’ ing dapat maging ‘Order’!
Antimurin dening papapakbung baril
A nu’ dakal na la ken ding aksidenting
Apate ra keng ‘indiscriminate firing,’
Pero pane ra pang daraptan ding muting.
Ampon alang disiplina king sarili
A sukat magbante king bage antiti;
Antimo ring pulis at ding military,
Pero misan ilang pasimuno niti.
Kasi balamu pin ing moro-moro mu
Ing anti kaniting mayayakit rugu
Karing keng gubyernu, a e tamu balu
Nung seryoso la o gagawan dang biru
Ing anti kanian a kaselan a bage
A e ta’na sukat pabustan ing pane,
Ing balamu alang kaseryosuan tune
Iting kekata ra serbisyung ibabie.
‘Dismissal on public service’ ken ing agad
Maging atul banting lubus nang mapatpat
Ing kesyasan buntuk ding mismung alagad
Ning gubyernung pemalenan da ring korap!
Uling angga’t dakal lang iresponsable
Karing ‘public servants’ at memalen pati,
Ninu mang ilukluk tamung presidente,
E magbayu ing asanayan tang’ iti~!
