Kung kaninong kampo posibleng nag-ugat
ang tsismis hinggil sa umano’y nilimas
ni Oca Rodriguez ang kaban ng siyudad
ng San Fernando ay grabeng pagkakalat
Ng nakasisirang impormasyon laban
sa pagkatao niya bilang ‘public servant’
na naging matapat sa panunungkulan
sapol maluklok sa palingkurang-bayan
At kung saan siya’y naging city mayor
sa naturang lungsod nang siyam na taon
bago binalikan ang pagiging Solon
sa 3rd district bilang kapalit ni Cong Dong
Na napataob niya sa patas na laban
at ika nga’y walang mantsa ng dayaan
na maaring naging mitsa ng isyung yan,
bagama’t pupuede nating isangkalan.
Posible rin namang dating nakasama
ang otor n’yan para iligaw ang masa;
Dahilan na rin sa itong pulitika
ay wala rin namang tiyak na kasangga.
At marahil kahit kaututang dila
ng butihing Solon ay kayang gumawa
Ng ganyan sakali’t sa tukso ng kapwa
Ay mahikayat na tapakan si Oca
Madali rin namang gumawa ng isyu
na ikasisira ng matinong tao,
lalo’t personal ng pagnanasa nito
ang mangibabaw at umiral ng husto.
Di ko sinasabing isa o kabilang
sa dating kagrupo at ibang nahalal
na opisyal itong maaring may alam;
Nguni’t lahat na ay posible kung minsan
Pero hind pa rin tayo kumbinsido
na ang tsismis hinggil sa simot umano
ang kaban nang datnan ni Mayor Santiago
ay di sa city hall nag-ugat yan mismo.
Alalaon baga, sa puntong naturan
ang dating mayor ay sinisiraan lang
ng kung sino para ang napakagandang
samahan nila ni Edsa’y mabahiran
Ng lambong kumbaga kapag inakala
nitong dating city mayor na si Oca,
na ngayon pa lang ay baka gumagawa
na ang kung sino r’yan ng ikasisira
(Ng imahe niya bilang ‘most awarded
city mayor San Fernando (P) ever had
pagkat wala naman ding nakatitiyak
sa kahahantungan ng kanilang bukas)
Kung kaya’t maaring kahit di totoo
na simot ang kaban nang lisanin nito,
ay pinamalita na mautang ito,
gayong ang iniwan pala’y bilyong piso?
Ni Mayor Rodriguez sa kanyang ‘successor’
na si Edsa – at di kagaya nang noong
si Dr. Rey Aquino ang naging Mayor,
ang ipinamana’y utang ng city hall?
(Kaya’t nang tangkain nitong makabalik
upang manapa ay minsan pang umulit,
natalo kay Oca ng dalawang beses;
Aywan lang ‘comes 2016’ kung uulit!)
