NGENING nung wari sa’ keng dase pigkeran
Makalulun na ing eleksyong miralan,
At ing bukud bakas malino melakuan
Pulyetus a dakal karing pipagbotuan
Iti karaniwan nang na mu ping eksena
Keti Pilipinas keng bie pulitika,
Nung nu’ kaibat itamu ken ing magdusa
Keng pamaglinis king likuan dang basura.
At ding pulitiku a dapat maglinis
King likuan dang kalat ding dipa’ning dyaskis;
Pasalamat ka nung atin ka pang akit
Ban ing basurang yan akua rang iligpit.
E ko’ tutodusan… ding keraklan karen
Masipag la kabang atin lang buri ren,
Pablasang kaibat na pin ning alalan ken
Metung man kareti e ta’no alelen.
Ing metung at metung kareting tinagal
Mika-istorya lang king bie ra malakuan;
King meging makalman, dangalan at galal
Kabang king mesambut, korona yang lakal.
Antiti kayumu’t kapait nung misan
Ing maging bunga ning tagumpe’t kabiguan,
Inya nung ala kang matibe parasan
Mekad isumpa mu ing bage makanian.
Insa’ mang alalan ating masasambut
Pablasang nung misan malyap ing paniambut,
Nung kabilang ka man karetang mesambut
O mealang kalma, e mu kalulungkut.
Lalu pa’t uli na ning bage pikatsa
Ikua ra ka reting king balen asira,
Deti mapalyaring bukas o makadua
Ila namang takman salpak at palyasa.
Talagang makanian ing bie pulitiku,
Misan kipmuan pait , misan sari yumu;
(Ina’nak – siran ne ing Ninong na mismu
King ba’nang akua ing pagnasan nang puestu).
Pati mikapatad, king panaun ngeni
Den e na’la naman mipapanatindi,
Uli na ning balang metung pin kareti
Buri na yang lukluk king likuan nang Daddy
O maski nanu mu a e pimamanan,
E baling malasak pamanang dangalan
Ding pengaring igagalang ning lipunan,
A sukat sesen da at paka-ingatan!
Pulitika mu yan, at iti e dapat
Maging dalan banting ing matibe aptas
Ning relasyun at/o pamikamaganak,
Muling alang kuenta at lubus malasak.
Pamikaluguran a sadiang matibe
Ding adua, uli na ning antiting bage
Masira ing tapat deting pamiyabe
Kabud ken la naman deti pepaytake.
Inia ikayu ken a makasoso na
King bie ngara pin alang pirming kasangga,
Antining iti yang kapad yung talaga
Samasan yu namung mamiling baraha.
Yan e makakua keng kabud mu diritsu
Potang ikayu na ing ken makapuestu,
Uling nung misan mu kilub paruminggu
Karin kayu lulub nanung agawa yu?
Ing kalulung balen ya rugung magdusa
Karing pasuelduan nang e naman magobra;
Sana’ing sadiang gawi lubus mibayu na
Ban e ta’ isumpa ing inalal ta’la!
