(Kaganapan ya iting makatuki karing kawatasan a pepalual mi kilub ning paruminggung milabas kaugne ning pamagmasusi ning lalawigan king Aldo ning Amanung Sisuan. a nung nu’ merapat ing mialiwang katatagan ampon aliwa pa a makarikil kaniti king Benigno S. Aquino, Jr. Memorial Hall, king Kapitolyu; at king Heroes Hall, ning Siyudad San Fernando).
Kanitang minuna, king barangay Ilib, balen Matalahib
katakap ning silim kareting memaryu ala nakang akit
magkulung la bale nung inia ing baryu bina neng tahimik;
byung namu ning angin ing kekang damdaman at kiyak ding kuliglig
Pablasang kanita king mesabing lugal ala pang kuryenti,
Ania mibalita, ing ating makakit tikbalang at kapri;
Lalu pang mesiri ing takut ding tau karas na ning bengi
pauli na pin pu ning magtindang balut a karin melili
Ing magtindang balut pagmumulalan de nung nu’ ya manibat,
kabud niamu lalsut busal ning talahib king dalan a gasgas;
Ing datukanan na karing titinda nang keyang gugulisak,
tiklis yang maragul a sasaklulwan na karing aduang gamat
Ing keyang siwala ngana nitang metung a keya dinamdam,
makapangilabut, balamu manibat kilub ning tapayan;
At metung pang bage, king maglakung iti kakung apansinan
Daratang ya keti ustung masala at mabilug ya’ing bulan.
At neng lalabas ya gagalaid na la detang keyang swekus,
e me akit lupa uling malapad ya ing kupya ng ebus;
Ania karing tau alang mengangas at mig masikan a lub
Kulaitan de mu man ban sali karetang titinda nang balut
King takut ding tau ala nang bitasang lalage neng bengi,
pelalung manasan at susulung tugak king bale magpilmi;
Maging ding magtinda sasaingsing nala ketang pangalugi
karelang kabyayan mesakit a bina pauli na niti
At uling lalto ing dakal a problema pasari ning takut
Misasanmetung la ding anggang memaryu, agad dang kinimut;
Ngana ning Kapitan, itamung lalaki e tamu matudtud
pakibalwan tamu ing misteryu tungkul king magtindang balut.
Anyang dalumdum na ding anggang lalaki, mitipun-tipun la,
magdala lang sibat, kampilan at lait a peka armas da;
At ban sikan la lub, king karelang nasa apikayari ra
Ing markang demonyo a seli dang alak yang itage ra na.
Saktung alas dosi, pablasang tahimik agad da neng dimdam
itang kulait na ning magtindang balut king gasgas a dalan,
Anyang katulid na karetang manaya king keyang panyatang
Inaus ne nitang metung a magbante, magtapang-tapangan.
Sali ko pung balot? ngana ning magtindang banayad linapit,
king babo lamesa karin ne pinatung itang keyang tiklis;
Basan a panakap karing titinda na tambing neng linislis,
mipamulala la uling ela balut ding karelang ikit;
Nune deti pala ebun lamung penoy ating markang lapis…
Neng: Vhelle V. Garcia
August 14, 2011
Abu Dhabi, AE
