Misan miglakbe ya ing kanakung diwa
King babo ning Bunduk minukyat malagwa,
Karas king tungatung migpaynawang bagya
Saka mematyawan ketang makababa;
Ding makabalebe king gilid ning sapa
Wari-waria’nala nung nanu lapin sa’.
King banang abalu agad nang kinuldas
Kaya lang lepitan ding kayang amalas;
King balisbis sapa nyang karin ya miras,
Itang kayang ikit ing kalma rang paldas
Ding pakakalulung king pibandyan lubas
Karetang kubul dang karin mibalangkas.
Menakit yang tau aplit nang bibili
King babo ning kubul ing yerung pitagpi,
Kartun at Lona mu ing kayang pisapi
A gewa nang tabing at kayang penali,
Sinilip ya kilub ting’ mesang malati
Karin la mamangan ding apat nang sapni.
Kitna’ne ing tau nung nanu ya ita?
Ing pekibat niti… yang bale mi…ngana:
“Ya ing tuknangan da ding kakung pamilya,
Neng kalulu ka mu masakit ing obra,
Inya mabayat lang payntunan ding pera
King bale maragul ala keng panupa”.
King babo na nita ating subdibisyon
Maki gwardia la pa detang bale mansyon,
Inya yang kitna’na… king bale maragul
Pilan la ding tau a karin maratun?
Adwa la pu ngana,”abroad” la magdatun
Daratang la keti ustu mung bakasyun.
Neng aldo bakasyun karin dala ulyan
Ding mansyon a bale alang manuknangan,
Kabang detang Kubul a kayang delanan
Detang makatuknang misna la karakal,
Sardinas la wari nung keka lang dasan
Makakera ketang karelang karinan.
Inya ining diwa kayang pibubule
Detang kayang ikit Kubul dane-dane,
King gilid ning sapa a makabalebe
At kayang kukutang nung tutu lang bale?
Nung deta bale la, ba’t e mipapante,
Keti babo yatu ing lakad na ning bie.
Ngara ding babasa king banal a libru
Karelang panaral, sinabi ning Ginu,
“Keka yang luguran ing kaparang tau
Kalupa ning lugud kanyang sarili mu”…
Nung yan, gawan ding mabandi’t pulitiku,
Lang lunto busabus at pakakalulu.
Neng Dolly Gigante Ferrer
Brgy. Anunas, Angeles City
