MISAN, king aplaya, king kakung paninap
Ing Ginu abe keng king pampang maglakad,
A nu’ ku ikit king biltangan ming balas,
Kaparis la kabud ding makalto bakas;
A mangabaldugan metung ya’ing tinalas
At ding kaku e ko’ bitasang abakas.
Intasa ngaku king sariling pamalak,
Kabud la adua ring lalto miamasamas?
Dapot mekakit kung bakas a’yaliwa,
A e bakas asu, kabayu o pusa;
Deti pabilug la at malapad bagya
At e alkus bitis tau keng kasala;
Lalto, uli na ning maragul lang bina,
A’yalang keliwan keng buldit ning banga;
Eku mamin a lub, at king Ginu kusa
Kung kitang obat den tainti la mong lepia?
“Ginu,” ngaku “tiktak la pu pangalapad
Ban aku pin pu ing karen makibakas;
Lalu’t pabilug la at sobra kalapad,
E la naman bakas bitis ning damulag.
Asisiguru kung deting linto bakas,
Den e la king nanu mang lelangan ibat;
Kabang aku’t Ika mu ken ing maglakad,
At alang aliwa keng pampang ning dagat”.
“Anak,” nganing Ginu, banayad sinabi:
“Wa e la pin keka ding bakas a reti,
Uling kikilikan da ka aldo’t bengi
Ban king baltangan mu king bie, e malili;
Pero wayning keka, bukud kung asabi,
Ika, ing keng dalan kusang pepaylili.
Inia natural mung ngening bandang tauli,
Sarili mu’ing bukud a kekang asisi!
Pauli ning baug a kapanwalan mu
At karing utus ku e mu pamamintu,
Lalu mung mebuya at melubak ustu
Kasalpantayanan a yukul mu kaku;
Inya naman ngening binang tikal na ku,
Belag da na ka ping e mu pilan ukdu!
At e mu dimdam ing kaplas agiang nanu
Uli na ning mamantinian dakang ustu.
E mu pagmulalan nung bakit ding bakas,
Tiktak la karagul ampon pangalapad,
Pasari ning deti – sabyan ku na’ing tapat,
E mo’ bakas bitis king balas tinalas;
Nu’ne ren king pilan besis da kang sildak,
A e mu dimdam mang unabis pin, anak,
King e mu asahan – nia tiktak la lapad,
Bakas lang buldit a migmarka king balas!~
Glossary:
Tinalas – tinuklu, dinalpak, miglakad
Mebuya – meyna, melubak, tutugun
Tiktak – sobra, milalu
Banga – paldanuman, pinuman
Balas – buhangin (Tagalog) sand (English)
Sildak – silsal, isinalya (keng Tagalog)
Kaplas – kirut, sakit, ‘pain’ (English).
Kasalpantayanan – kapanwalan, belief (English)
