I Pentung karas keng pamaninum alak
Katukayu ra ne ding ngara pin mekad,
Makabau ya pang tansan – ta’ne agad
Lalasing at e na diretsung maglakad;
Ing dalan king agyang malinis ya’t patag,
Magkabakulkul ya potang yang maglakad,
Inia ngara pin ding mapamuskang anak
Oyan makasingku litrus ya’y Kagawad,
King agyang anad ne ing keyang asawa
King anti kaniting matsurang bisyu na,
Misan, uli nitang katmu ne talaga,
Pengamanuan na ne king maling asal na
;
“E ra ka babawal maki-‘numan” ngana,
“Pero sana naman pakakalale ka;
E uli ning libri nganing asawa na,
Alduk kang alduk keng agua pataranta.
Ngaku wari keka king buri kung sabyan,
E ka sana rugu pin maki-sabayan!
Anti na ning medyu malagua kang tablan,
E ka dalukduk nang dalukduk makanian;
Pamisan-misan sa’, manekas na ka man
Ba’kang e malaguang lasing keng inuman,
Pilan ku nang besis sinabi keka yan,
Pibabalugbug mu, e mu ku pemintuan.
“O makanyan ku ping lalung malalasing
King anti kanian a kekang panabilin;
E wari napun pa sinabi mu na’yting
Kanaku maralas mung ipanabilin?
Tiparan ku naman at dininan pansin,
Inia makanian kung malaguang lalasing”
Antimo nabengi, uling gewa ku’yting
Ngamu manekas ku lalu kung melasing”
“O bakit naman mo melasing ka Pentung
Nung ing panabilin ku keka keng inum,
Gewa mung tagana ba’kang e migumun?’
“Aba, ikit mu na…’nang miliari napun?
Uling tinekas ku pati na ring mirun,
Migsunde-sape kung miglakad, mumugun,
Aba nang miliari, keng kasisitsit mung
Manekas digsu ku menabu keng kumun”!
“Imposible naman Pentung ing lasing ka,
Nung ing penabilin ku gewa mu pala?”
“Aba, yang gewa ku – manwala’t ali ka!
Balu mo, ba’ra ping e apansin ita,
Balang ating tikdo munta king kubeta,
Pasalikut kung inuman ing karela!
Angga king digsu ku rugu medisgrasia
Keng kasusulsul mu berat kung asawa!”
