MISDAN YA ing Titser kalub na king klasi
King sobrang kangie ring keyang istudyanti,
Nung bakit at nanu ing kaylian da reti
Inyang abalu na mipangisngis nia’yti;
Ing metung karela – ikit ne pin kasi,
Maglakad yang bala’ majorette’ ing alti.
Kalalaking tau maka-make up ya’yti.
Mingatba nang pisngi sapak koloreti
Maka-hanging shirt ya’t maka-short a mahung
At maka’step-in a three inches’ takong.
Ing kayang ‘lipstick’ king labi, kinapul
Maki-koloreti pati tungtung arung.
King polbung kine na king kanwan at tundun,
Yan e mipagyu keng metung a garapun.
Miglupa yang bangke a maka-kabaung
Ing dipa’ ning mayap a mabulul-bulul.
“Susmaryosep” ngana ning merusmyang Titser,
“Ninanu ka rugung migpakasira ken?
E na ka merine, ot arapat mu Ben,
Ing e ikapuri a gewa mung pialben?”
“Mam” nganang mekibat, migpakendeng-kendeng,
“Nanan ko’ mo, obat e ra ku paburen?
Ing tutu na, kaku – magkusuelu la ren
Neng mag- ‘perform’ ku pu ‘my beloved teacher’.
“Aba, Bienvenido, e ka kanyan-kanyan
Uling e ku maki-pagmulang-mulangan.
Ngening-ngeni mu rin keka lang dakitan
Ding kekang pengari ba’kong pakisabyan.
Ban kanita iti e mu na ulitan,
Dapat dang abalu ing kekang pangawan.
Ing anti kaniti, e dapat kusintian
Ding talaturu at pengaring ibatan.
Lukluk ka ken, e ka tatakas kanaku,
Ngeni murin parakit ke i Tatang mu
Karening babai a kaiskwela mu
Ban akasabi ke inggil keng gewa mu”.
Mañga media ora mekapagbalik la
Deting inutusan ning karelang Maestra.
Dapot imbes keta ing Tata yang minta,
Ing abe rang din’tang ya kabud Ima na.
“E mu balu ken ing makarine?” ngana,
Intasang gewa mu yan kilub iskwela?
At saka e wari rugu kanita pa,
Sinabi ku, e mu na ulitan sana?
Pota, miyadia ka… iti, e magmintis,
Kabud panyatang nang Tatang mu mayakit,
Ing pamaniaptan mung mapakialam gamit;
Obat ing make-up na ing kekang ginamit?”
