Inyang misan a Sabadu keting radyu Kapampangan
Ing Poeta Doy Higante migale yang kawatasan,
Paytunan yang tugak tutu… makanya’neng pemansagan
Ena sana ikakamwa nung kaku yang pakibatan,
Pablasang keti Angeles o yan kekong pagumasdan
Ati’nayu at meyakit ing tugak nang PANINTUNAN.
Batyawan ye ing Angeles o yan kekayung akakit
I Mayor ED PAMINTUAN king lugud na’t malasakit,
Deting sablang kabalen na susuyua’nong anggang binit
Ketang yatad nang serbisyu ing maluka yang makaigit,
Pablasang ing pagnasa’na deti ela magkasakit
At karas king katuliran kaya alang kapit-kapit.
King syudad na ning Angeles lawan yeng aldo makaslag
Masala ya’t alang lulam king serbisyu nang lalatag,
Kilub na ning atlung banua masalusu yang miglayag
Karin king banwang katasan susulapo mamayagpag,
Inya ikong Angeleno dapat kayung magpanatag
Kabang Mayor ya’y PAMINTUAN ing balen lalu yang tatag.
Bat mo eko magpanatag, keti mabilug a yatu
Apulung mayap a Mayor yang menikwa king kawalu,
Ing buri nang sabyan niti babie nang ustung serbisyu
Keti syudad ning Angeles karing sekupa’nang tau;
Inya ngarang magsalita detang tambay karing kantu
Ken, sesela’nakayu mu… nanu pa ing payntunan yu.
Nanu pa ing payntunan yu, kareting ikwa nang galal
Ning Mayor ED PAMINTUAN, syudad ya ing mirarangal,
Karing yatad nang serbisyu eya biasang matitikal
Uling king busal nang pusu ing kayapan yang bubukal,
Tungkulan a pigkalub yu, inyang kekayu yang yalal
Gimpana’nang masalese,wagas, dalise at banal.
Ninu na mong menungkulan o meging mayor ta keti
A malyaring kekong itext, ban kekayung akasabi,
Nune I Mayor PAMINTUAN uling ing kayang sarili
Lalam ning pamanungkulan king balen na pepabandi,
Inya naman sasabyan kung matning-matni keko ngeni
Sanakan yong manungkulan ala nang migit kaniti.
King Poeta Doy Higante, kaya payabut ku naman
Tugak tutung payntuna’na tyu’ne king kayang arapan,
Maswerti lang ANGELENO tin lang tapat manungkulan
Alang sawang magserbisyu karing masang sasakupan,
Karetang kayang proyekto sambitlan ko ding mapilan
Nung sakali kukulang la, ibie yu ing karagdagan.
Karetang “informal settler’s” ting proyektu nang pabale
Kanyan namang kalikasan, Kalinisan, “one million tree,
Ting “renal care” karin ONA… ating “Philhealt” dapang pamye
Libring Doktor keng barangay, libring panulu rang babie,
“City COLLEGE, INTFRUSTRACTURE”, kaayusan masalaese
Kang Mayor ED… AGYU TAMU… SAUP-SAUP… ABE-ABE…
Dolly Gigante-Ferrer
Barangay Anunas
Angeles City, (Pampanga)
