ATLU la mu retang Ari a migsaria king Bethlehem
ban iyapa ra ing Mesias a inaus dang Emmanuel
balang metung magdala lang lamak a pigkalub da ren
ketang pungul a mibait, at Ari na ning Israel.
Deti ila pin kabud di – Melchor, Gaspar at Baltazar
a menibat king marayung labuad dane ning aslagan,
pauli na nitang sala, ketang tala manibatan
atagmuan de itang Mesias a karelang panintunan
King bibliang Bayung Tipan, atlu la ring mesambitlâ
bukud karing mesaglawe, ala no’ng abe aliwâ;
ken mang sulat nang Isaias, ketang Mayap a Balitâ
atlu la mu pin ding Ari, a malino mipawagâ
King milabas a panaun, ating makudtang sinulat
digdagan no’ng metung detang, Ari a gewa nang apat,
pero agpang king istoriang belangkas nang Henry Van Dyke
Artaban ya kanu lagyu, aring sinabi nang kapat (fourth)
Dapot iti kudta nia’mu ning malikut nang pamisip
ning mesabing talasulat king istoria’ makapildis,
salungat ya king katutuan, ing paniulat nang linubid
a purus ngang kalaraman ban pampanan ing matulid
Pablasang king istoria na, ini kanung i Artaban
kayabe re sanang mako Melchor, Gaspar at Baltazar
dapot kabang maglakbe ya, tiknangan ne at sinopan
itang ikit nang lalaking makakasat ketang dalan
Pauli na ning milyari ketang pisabi rang oras,
king pangabalam na niti, e na rugu ikuang miras
king nasa nang mitagal ya, karing atlung aring pantas
menintun yang akayabe, a beyaranan nang perlas
Dapot deti ala nalu, iniang miras la Bethlehem,
Meko nala nung iniasa’t karin e ra no’ disan den;
uling utus nang Herodes, karing kawal ning Israel,
balang bingut a lalaki, gisanan dalang pamaten.
I Artaban atin ya mu namang lamak a darala
anti karing Atlung Ari, den king pungul inampang da
at basi king pulai na ning misulat a istoria,
itang kayang pamanintun miras atlung pulung banua.
At iniang abalita’nang ing Ginu ta’ng Hesukrstu,
kamatayan king krus itang kayatulan nang Pilatu,
pigsarian ne king Golgota, dapot mepakal yang batu
ing buntuk na inia e na ikuang miras king Kalbaryu.
Kagnan na ning mapatad ya inawa ing Guinung Hesus,
king ayun a mangasikan, mengabanga’la ring bunduk;
at iting mesabing batu, yapin ing keng mismung buntuk
nang Artaban, tinud iti, at miyungle neng melaus
At kabang ining Artaban, makakasat ya king gabun
“Guinu” ngana “e ra ka man, ikit a kinaung danum
o meranup mu man sana, at king prisidyu mesukul
e ku man mo mekasuyu, king kekaba’ning panaun”.
Atin mo kayang manwala? Ing ating kapat a Arî
nung atlu la mu ring lagyung karing biblia makabilî?
Mekad atin, at ila ring, taung e biasang susurî
a maralas mayayasag karing impurmasyung malî.
Inia atlu la ring Aring dapat tamung kilalanan
a minapa king Mengabus king kekatang kasalanan
uling yan ing makasulat king banal a kasulatan…
I Artaban kudta nia mu, ning lipang a kaisipan!
