Kapanwalan matwa nu’ ra ngan binasi
At tutukian ta’la ren angga na ngeni,
Bista’t salungat ya ing siyensya kaniti,
Pero e la lubus mekalingwan deti.
King siyensya bistaman ating eksplanasyun
Karing sablang bage dinian dang atensyun,
Pekatutukan do’ karing obserbasyun
Mirinan pakibat, malino konklusyun.
Antining ariya nung pakasuryan me
Dakal lang tatakut a salungatan de,
Atin mang katutwan o pala-palage
Dapot deti kabud la mu mililele
Metung a ariya, nung ating mamangan
At ating mamako king bale ninu man,
Kailangan idurut do’ kanu ring pinggan
Ban king mako alang sumbagal nanu man
Nung mabugtut neman asawang babai
E dapat mangulkul kanu ing lalaki;
Antimurin ustung karas na ning bengi
Bawal nang mamalis, mitapus ing swerti.
O kaya naman keng arap na ning kalang
Ustung kakanta ka e kanu mayap yan;
Datang ing aldo a lubus mung pagsisyan
Makapakiasawa kang matwa nang sarang
E kanu mayap ing mititipang ulun
Nung ume ne kanung kinet ing dalumdum;
Atin lang ariya tungkul karing ebun,
E la miyapsa nung mirasan lang ayun.
Ustung lilibad no’ ding ayup-ayupan
Malapit na kanung datang ing kauran;
Panabilin da pa e mo kanu atwan
Uling deti kanu lakwas lang darakal.
Miyayaliwa nang kasebyan, ariya
Pane daramdaman kareting makatwa,
King kekong palage reti subuk na la?
Asno’ kaseryosu king bage antita.
Ding ariya dapat la kayang panwalan?
Obat deti e la lubus mekalingwan?
Uling ing lohika a ken makabusal
Ala namang marok nung gawan ta’la man
Dapot keng kasebyan ating magpatutu
Mayayakit a e kabud pigawa mu,
Talimhaga la man pero e la kuru
At king karanasan la reti mibubu
Kalupa namo’ ning dutung a mabasa
Ustung milapit ya king aping bubugka
Uli na ning paling kaniti magmula
Mekad mu kabud nia mikalabkab bigla.
Alang damulag a dinulung keng labak
Ing kasaka niti e mengasnang burak;
At e ya magdatun keng dayat ing tagak
Nung e ya manikwang lito-lito tugak.
Ing luksu na ngara nitang gaindung kambing
Ding kayang biseru deti antimurin,
Nung masigla neman ing metung a tukil
Alang laman kilub nune purus angin.
Deting mesambitlang ariya’t kasebyan
Katali nong’ pusad kultura tang’ menan;
Bista’t durusug ya ing kapanyulungan
Tutuki la reti’t e la malalakwan…
Neng Vhelle V. Garcia
June 24, 2013
Abu Dhabi, United Arab Emirates
