Ing makipagobra nu’man sang’ kumpanya
Dakal a mialiwang benepisyu keka,
Muna kailangan ing mika SSS ka
King ba’kang mag-pensyon potang matua naka;
At keng GSIS nung king gubyernu ka
Migserbisyu ampon megobra talaga.
Kabud a meging regular kang empleadu,
E mu ren ding kekang maging benepisyu;
Bukud king promosyon o mitas ka sueldu,
Atyu naman ken ing Bonus mu neng Pasku;
At karagdagan pang malyaring akua mu,
Yan kabud ing Pensyon pamag-retiru mu.
Subali kareting aduang mesambitla,
Atin ka mu namang Philhealth, a menasa
Yang makibat potang sakit ka o kaya
Karing kekang anak, y Tatang at Ima
Ilang magkasakit… pati pa aliwa,
At aliwang gastos ya naman ing bala.
7
At ‘sick leave’ a nung nu’ atin kang panayan
A maging sueldu mu wari’t sakit ka man;
King agyang ‘absent’ kang kulang king pabulan,
Alang mabating a kekang panakitan;
Bukud king libri ka gastus king ospital,
Pati panulu mu… posibleng libri ngan.
Katataulian diling tanggapan mu keta
Potang retiradu na ka’t e magobra,
Ya ing ‘retirement pay’ a biglang ibie ra
O ing kekang pensyon a binggitan ku na;
Tao, deti ilang mipagkalub keka
Kaibat mung migsilbi a mapilan banwa.
Pero sumangid na ning mesabing iti
Ing tau nung misan e ya pa kumpormi;
Bista’t mebayad ing keyang pamagsilbi,
Atin pang damdaman mung magsabi-sabi;
Pablasang keraklan ding anti kareti,
Agyang e ra paglub pabayad da pati.
At nung king bage yan ating argabyadu,
Ing Damulag mekad ya’nang panodus ku;
Uli ning migit pa marahil king tau,
Itang matindi nang meging sakripisyu;
Bukud king ala yang tinggap a probetsu,
Kakambal pang barug ing keyang serbisyu.
King tinggap nang galal a peka-malagu
Ya’ytang pandapug de agyang malagad mu;
Makusuelu ne mo’t maligayang tutu
Nung karin king ilug libri yang mandilu;
Madalas kakambal ya pang palu-palu,
Nung king pamaglabak neman mipasubu.
Antayu ing dapat na niting tanggapan
Kaibat ning serbisyu na at kapagalan?
Nanu’t pati sarili nang karapatan,
Mipagkait pa king lubas nang kabilyan?
E pa wari sapat ing kayang kasaupan
A keka binye nang e pepabayad man?
Ante ing pensyon na ngening gugupu ne
Ninung asahan na a kaniti munye?
Sapat na wari ing pepakan meng kumpe
At pistulan keta karin king marangle?
At ngeni mo rugung e ne migulabe,
Karing Matadero yatad meng papate?
Kapalit ding keka ibie rang salapi,
Ding ala mu namang masabal king bili
Ning pakakalulung meragul king lati
A e mirakayan masanting a sukli,
King keyang pigsilbyan ibat king malati
Bistama’t siywan neng alang pasubali.
Baket liyus ketang ablasan dang mayap
At sesen da nia mu king tauli nang oras,
Kamatayan pa ing kaya maging ablas
Kaibat nang pegobran ala namang bayad
At akasaup nang pepagaral anak
Ning alang balikid king aldo milabas.
Pilan na kang banwang pigkakasakitan
Karin king marangle e unabis likwan?
Kaibat mo pin ngening ala neng sikanan,
Busten mu nia rugung mate nang makanyan?
(Kalulung damulag nanu ing kalmang yan,
Ante ing justisya king kekang kabilyan?
