(Kaugne ning ‘Grand Launching of the National Arts Month 2019 in partnership with the National Commission for Culture and the Arts’ a merapat inyang Pebrero 15, 2019 king Vista Mall, Siyudad San Fernando, (P) iting poesia a sinulat ning maluka yung talasuyu, ya pamung ibie mi para king malugud yung pamamasa).
NGENING mapilan na la mu,
Talasulat king Amanu
At ding mabie pipamasan dimut na la namang pihu,
Idagdag pa ing katutuan –
Keti Kapampangan mismu,
Ing salitang amulatan e ya magagambul ustu,
Nanung sukat ta’ng asahan?
Tanggapan at ali tamu,
Bait ya mang Kapampangan… king Salita e larinu.
At maging ding aliwa ta’ng
Punbalen at lalawigan,
Dakal na la ring e ra ne bitasa mang gagambulan;
Masasabing ing lahi ra
Liping tune Kapampangan,
Dapot king amanu’t dapat malaut la king katutuan;
At nung pakatingiran ta’
Itang kimut da, nung misan…
Balamu mo, anti re pang pikarine gagamitan.
Makanyan la…at maging ding
Kalalawigan pang aliwa,
Antimo ring keraklan a memagdatun na Menila;
Deti, nung datang la keti
O mamasyal ban manapa,
Ing pamanga-pampangan da balid na pangasalita;
Inya naman ing amanung
Sisuan king salu nang Inda,
King makanyan e makalis karing danggut tamung dila?
Kenu ta’ ngeni manalig
Karing opisyales balen,
Anti na ning dakal na’la retang alang masabal ken?
Angga ta’nia wari namang
Lalon pamalugse ra ren,
At e ta’na kimut banting gambulan ya’t miuman sesen?
Antalu ring gugulisak
Balang alalan pambalen,
Baket ngeni e ra’ypakit ing tune malasakit den?
Inya nanung sukat daptan
Banting e ya mate lubus
Ing Amanung Kapampangan a ngeni maybug nang lumbug?
Iti, ya ing sukat unan…
Pakatibe-tibe buklud,
Kambe ning matapat tamung keya pamibuklud-buklud!
At ken alang sulit mekad
Managumpe ta’ng tibubus
Lalam dang pamanantabe ding mapilan pang malugud.
At karing malugud a ren
A ngeni anting mamitbit
Kabilang ya iting siyudad, lalam ning ‘Tourism Office,’
King nanu mang ikasulung
At tagumpe mayayakit,
King kimutan ning AGTACA a ngeni gagambul pilit
At ken magmsabal ganap
Banting apalabung aplit
Ing Salitang Kapampangan a sukat ta’ng pagmasakit!
