Bigla itang lulam king bigang susuldan,
Kaybat nang meramdam
Ning matinding kurug, a mipapamisan
Pisakit dang bildug ding Agilang bakal,
Babo malimpuyut!
Ing balang mituran mamapi’t bubusuk;
King siyudad at parang,
Dakal lang mitimbwang!
Ninu’yting mengangas, a keti migtangas?
Sakang ya’t bakukak,
A nung nu’ ing Aldo, yang keyang sagisag,
Gewa nang simbulo; Dakal ya pepakiak…
Dakal ya linaso,
At dakal ya lesak ing kayang Imperyo!
Ing likuan nang bakas,
Malalam lang sugat!
Telan no’ kamau at sikmal no’ng ustu,
Ban musig ding tau
King kayang kaburyan…King agyang atilu
Keng kapanibalan detang lider tamu
A sukat maramdam;
Puppet a gubyernu ing keta miniral!
Y Uncle Sam antayu
At ding Bayani mu?
Wayta, tiniplad ya, misan na la likwan
Keng pamakilaban
Ding kawal ning Lahi libutad ning Parang
Ning dimla at pali; At waman katutwan
King ing keyang Lipi,
Kaniting labanan yang maki-pasari
Maybug nang takasan
Ing kapakibatan!
Makanian man uling balu na’nang tambing
Yang sisian da murin
King kimtan ta’ng lugma, pengaku na niting
Magbalik yang kusa, itang kaibat na ping
Apatatag bagya
Ing puersa na karin king aliwang bansa;
Wa migbalik ya pin,
Pero na’ng melarin?
At kabang alayu i Uncle Sam… nanu?
Wayta ing Berdugu
At ganid a Sakang, kinabsi yang ustu
King e na pibandyan; Puri’t dangalan mu
Sinintang na misan,
Kambe nang Indu mu, mete alang laban!
Ante i Tatang yu
at ding kapatad mu?
Atilu king bunduk king tawli rang mu-ug,
Ban king pamipamuk
Akwa rang misalba at e ya malaus
Mibwal ing Bandera; Ing mate… sumambut
Manyaman karela
Akwa riang ayatbus ing Balen ta’ng Sinta;
Pilan lang metampus
A mete king danup?
Dakal la, at kyan na teya ning metung pa
Ing bie na’t inawa,
Uli ning tungkulan kanitang adwan da
Ding lasip a daywan… ban manib karela
At maki-adwangan;
Biryan na pa keta ing mate Malabang,
Kesa king musig ya
At maging puppet da!
Ninu’yting king aluk a e ra ayabluk?
I Jose Abad Santos,
Na ning Kapampangan a tune malugud
King sintang balayan; Biryan nang metampus
Ing bie nang ingatan,
Kesa king painggulut a’yalang dangalan!
‘Tin pa kayang mapus?
ala… ya na kabud!
Sakali atin man, e ta’ na akit yan
Ngening ing Balayan
King keyang kabilian, ala neng datang pang
Antimo kang Rizal; Uli ning katutuan
A ikwa nang mibwal
Ning pagasa tamu karing kayanakan,
Keng alak at sugal
At panulung bawal!
