Tumakbo para sa eleksyong darating
Eh, bakit ngayon lang naisip sitahin
Ng mga damuho ang ‘Anak ni Da King?’
Matapos mahalal bilang Senadora,
At ilang taong ding nakapagsilbi na?
Sana noon pa mang unang pagtakbo niya
Ay hinarang na ng mga kontrabida.
At di nitong kailan patapos na bale
Ang ‘term of office’ ng mabait na Ale,
Saka sasabihing siya’y di pupuede,
Pero hinimok tumiket bilang Bise
Nitong iba gaya ni Binay at Roxas?
Kaya tunay namang napakaliwanag,
Na self interest ang dahilan ng lahat
Kung bakit siya’y hina-hanapan ng butas.
Bakit kung di dahil sa pagtanggi nito
Na makatambal siya sa pagka-Pangulo
Ay di umangal ang alin pa mang kampo
Para harangin n’yan ang kanyang pagtakbo?
Eh kung halimbawang napapayag nilang
Tumiket kay Roxas o kaya kay Binay
At naipanalo ang kanilang laban,
Pero ang halal na Pangulo namatay?
Sino ang papalit o maupo dapat
Kundi ang Vice ayon sa Saligang Batas?
Alangan namang ang pumalit at sukat
Ay kung sino lang na biglang isasalpak.
At kung igigiit mandin ng kalaban,
Na disqualified siya kaya hinaharang
Ang pagtakbo nito ya’y napakalinaw
Na katangahan ng kinauukulan.
Ganun pala – sana nang humabol siya
Noong 2013 kinuwestyon na nila
Ang citizenship ni Grace kung Filipina
O apo ni Uncle Sam ng Amerika.
Disin sana ay kung sino ang pang-huli
O panglabing-tatlo sa resulta bale
Ng senatorial race, ang ngayon kasali,
Sa Senate (at baka nag-Speaker pati?
At kung saan ayon sa napabalita
Ay sinusulsulan si Dick Gordon yata
Ng kung sino upang i-claim niya ng kusa
Ang posisyong dapat sa kanya ika nga?
Kung ang pagtakbo ni Ms. Grace Poe ay labag
Sa Omnibus Election Code nitong Pinas;
Aywan lang kung may legal effect na dapat
Masunod upang si Gordon maka-akyat? )
Kaya sa puntong yan na kung kailan si Poe
Ay hahabol nga siya sa pagka-Pangulo,
Saka lang sinita ng kalabang kampo,
Yan ay pinagtaka ng maraming tao.
At posibleng kapagka’ napatunayan
Na ang paghabol niya ay may legal stand,
Higit pa marahil sa inaasahang
Makukuhang boto baka dumoble yan.
Dahilan na rin sa lalong lumalakas
Ang candidacy ng taong sumisikat
Sa mga batikos na hindi marapat
Ibato para lang siraan at sukat.
Aywan nga lang natin sa ibang tao riyan
Kung bakit nang dahil sa personal nilang
Hangaring minsan ay ‘self interest’ lamang
Ay nagagawa ang hindi karampatan!
