I.
Atin mapilan sasabing, malaram la ring poeta
lakuas na neng pamurian do, ring puputungan dang musa
magsilbi ro kanu ngarang, apalagu ring matsura
pasari na ning karelang , dila neng mamikudta la
king bista’t man ding babai, kasikang do retang baka
kabud ila’ng migsalita, lalagu lang anting santa
ding kapambuk babing dikut, at kayarung tugak saba
arapat dong ilarawang, kalupa nang Ara Mina
II.
Agyu ra lang paniungkitan, detang batwin king katasan
ban gawan dong kuwintas para, karing karelang palsintan
itang biga magsilbi rang, ilangkul at panigutan
at ibuknul itang angin, neng ila mung makatalan
ing laram da ring poeta, metung ya mung kapusungan
ban kanita ring malugma, karela lang pamatulan
e anti karing aliwa, ing karelang kalaraman
ing armas da ban takpan ing, katutuan at katalaruan
III.
Mumuna nong dili retang, mapilan a abugadu
a bubukut king matulid, at tutulid king likoru
ban kanita mikabus la, ring taung mikayasuntu
maniabi lang kalaraman, king ba la mung miyabsueltu
antimurin ding aliwang, manungkulan kekatamu
a binotu’t pigtiwalan, ding tau ban mangubyernu
anta’yu ing pangaku ra, a tutung pamagserbisyu?
nung agisan deng alimas ing kaban ning balen tamu
IV.
Neng misan ing kalaraman, atin yang mayap a bunga
karetang bageng magsilbing, pagumpisan ning disgrasya
alimbawa pantunan de, ing taung e mikasala?
ituru me nung balu mung ilang makamate kaya?
Dapot nung ing pamaglingad, ban takpan ing anomalya
apin yan ing kalaramang, ating katulid a karma
datang mu rin ing panaun, itang anggang penako ra
mangari mu namang bula, a mabating ngan karela
V.
Ding malaram!, mapanako!, balu ta nung ninu ila
e ta la man tunggen lagyu, dakal lang makakilala
ila retang pulitikung, milalu kasaklo mata
karas king kapanakawan, ila namang manimuna
ila alus ding linaklak, king egana-ganang grasya
kambe da ring galame rang, abe rang migpaka-kualta
ing kanakung pepawaga pakatandanan ye sana
IlA kabud ding MALARAM, at aliwa ring POETA..
