NUNG balat-sibuyas ka’t mapanamdaman,
Dakal ka katoto at kakaluguran,
Ing bie pulitiku e mu paninasan
Uling miras mu king e dapat kaulyan.
Pablasang nu’man pin katibe ing buklud
Ning pamiyabe yu, mekad kabud-abud
Masira mu iti at ganap mapatlud
Potang yan ing kwenta ken magsilbing bakud.
At keta personal nang interes niti
Itang sumira pin king bage mesabi,
At muli mung alang kwenta bandang tawli
Itang masanting a ugnayan yu reti.
Antimo ring sadyang mitiket kanita
A meging mayor at bise alkalde ra,
Ining tauli uling binang marapal ya
A maging punbalen, ing sabo sekub na.
At yan aplit na ne niting pekisiran
Ing mayor a keya matapat memusan,
Kabang nung e mu pin uli ning taung yan,
E sumambut ining inabe na bilang.
Pablasang pasari namu ning ambisyun
Ding sadyang abe na meging ‘councilor’
(Partikular mismu keni king San Simon)
Adua la karen ding parehung mig-mayor.
E ku buring sabyan, ing den bandang tauli
Milaban-laban la antimong Alkalde;
Nune ing bukud ku mung ngeni asabi,
Ing meging ‘stepping stone’ da’y MSB.
Di ‘ex-mayors’ Digos Canlas, Azor Sitchon
Konsehal la lalam nang administrasyon
MSB, at nu’ i Digos yang mig-Mayor
Siyam a banwa… kaibat ing memalit i Wong.
Nung nu’ i MSB ing akalaban na
A suportado na ping Digos, nung inya
Asabi kung karas pin keng pulitika,
Masulit makakit tune akasangga.
Inya nung isipan at suryan banayad
Ing ngeni tsismis a king balen kukusad,
King i Rommel B yang balak dang isalpak
Bilang Bise nang Wong ating ken mabalag.
Partikular karing kasangga na mismu
Nining bisang tagal mayor pasibayu,
Antimo i Keko a pilan nang ukdu
A meging ‘vice mayor,’ tumiket ya kenu?
O keng pulitika talagang makanyan,
Ala tamung priming kasangga’t kalaban?
Ding ngeni kakampi – ating aldo datang
Ila pa mekad ding mortal tang’ kalaban.
Uli ning migit king nanu pa man yata,
Ing mesabing bage kumpara king sabla,
Peka-marinat ya keti king masala,
Kase ‘self interest’ ing magbabo kusa.
Pablasang ngara ping magsalitang tapat,
Ding masibukan keng pulitika, dapat
Atin lang tetagan at pusung busilak
Arapan ing bage marok ampon mayap.
Pabanwa pa alus bayu miras, datang
Ing 2022 Pambansang Halalan,
‘Just watch out’ ngana ping Goriong Baritaklan,
Nung ninu karen ing sukat paniwalan?!
