KENG lual ya’yni mekad, mekapagsumite
nalang indibidual da reting COC
ding tatagal Senador, Representante,
Gobernador, VG, Bokal at Alkalde;
Bise Alkalde at saka Konsehales,
a nu’ ring bayu at bisang mag-reelect
para king nung nanung puestu dapat i-elect,
lon ta’ king kagiwan da at nu’la ‘tested’
At itamu bilang botante ing karen
sukat sumuri at dapat pakalawen
king nanu na’ing gewa ra para king balen
deting miuman bisa na namang tagal ken
Nung nu’ ring aliwa bista’t mipuestu la
at pilan nang besis sinambut, nanu na
ing king Indungbalen deti asuyu ra
lub ning pilan banuang pamanungkulan da?
Nung ukulan tamung ing sariling dungus
ding mapilan ilang keng kabsi mebuktut,
den e tano’ dapat pabusten milukluk
ban e la dakal ding keng gubyernu salut.
Antimurin naman ding ngeni pa mekad
king bage mesabi makigagad-gagad,
den sanakan ta’la pamung miamas-amas
at e tamu basta mamalal makapiak.
Uling e malaut ing magkang ngara pin
ing mangilag tamu keng dimla kikingking,
king kabaligtaran , duldul a mamaksing
karin ta’ manganib keng katni maliping.
At ngana wari king matulid a sabi,
mangilag tamu keng mapanako bibi,
pero ing apili tamu bandang tauli
pun de ring tulisan ing kabas na niti!
E tamu paytake king asna katigik
a galamanu ring kekata lalapit
maglolo at keta itamu dusuldit
ing aranan da ban karela mamitbit.
At banting upayang ing kapagnasan da
a manatili king puestu asundu ra
kapamilatan ning kekatang suporta
kabang magkusuelu la keng pulitika.
At nu’ e malaut ing kaulian niti
pamagsamantala a sobra katindi
king kaban ning balen ing mangapalyari
ampon apilasa tamu bandang tauli.
E na man king anti ta’lang tutodusan
ding keng gubyernu tinalan katungkulan,
pero e tamu pu lubus atawaran
ing atin pa muring ‘dorobo’ nung misan.
Malagad lang bina ding antimo keti
king Balen tamu ring matapat magsilbi,
partikular ken king Kapitolyu ngeni
pablasang ing Timun ‘active’ ya parati.
At karing sakup nang ‘Tata’ at ‘Indu’ ra
ding sablang balayan mikakasundu la
king meto’ parasan, a ikasulung na
ning kekatang kabilugan a probinsya.
Inya nung ding balang probinsya at rehiyon,
mika-anti la king ‘tested’ a Governor
a kalupa ning ken ngeni king Capitol,
e na kailangan pa ing mika-Eleksyon
At nung ining bayung batas keng alalan
a babalakan dang ‘no term limit’ na ngan,
ken e kaya lalung dinat ing alalan
kabud ing antiti ya ing mipamintuan?!
