nung inya ding balang kandidatu kanyan,
ati’no naman ken mamaniatang miuman
karing sibabale karelang pamuntan;
Ing kaul-kaul at kumustang dakal,
pasibayu karen ya na namang miral;
Dakal la ipangakung e ra agyung daptan
inia ren e ta’la agad paniwalan.
E pa man, kilub na ning aldo-aldo alus
akit tano’ namang king balen maglibut
at pakirasan ing pelalu kalaut
a barangay ampon balayan dang sakup,
ba’rang kekatamu kanu apayabut
ing kapagnasan dang ngara makasaup;
(Waman ing tutu na, ing tune rang imbut
ila ring kekata’mu maniawad saup).
Kilub ning aldo-aldo pamangampanya ra
e mu mamagkanu ing maging gastus da;
Ken mung para saken, krudu’t gasolina
nu’re apanagiu ing maging sueldu ra,
sakali man deti mikalmang miyalal la?
Inya naman potang pakalukluk na’la,
ing kalulung balen ya rugung magdusa
keng kapanakawan ampon aliwa pa!
Menasa mengari lang magbebetu ren
a daratang bala mung magpyestang balen;
Buri rang ipakit mayap lang memalen,
king agya mang deti e la maratun ken;
Pero nung ngara mo ing imbut dang sesen
ampon ipaglaban ing para king balen,
marahil kaybat na… e mo man alelen
at ing katuparan e mu akit karen.
Pablasang meyakit na king aldo napun,
ing tune aske ning asna king karagul,
ngara ning imbut dang akua reng ibangun
ing kalulung balen king dusa’t pagmalun;
Uling keng ‘Matuwid na Daan’ nang PNoy
ing problema lalu mu yatang meragul,
kasi pin ing sangkan a peka-maragul
iti pasari na ning ‘graft & corruption’.
Pakapilinan te’t suryan miamasamas
nung ninu’t insanu ing karapat-dapat;
E ta’ sa paytake king talan dang gamat
a palamnanan dang kualtang ipamitag,
uling kaybat nita… king aldo ning bukas
ing kalulung balen ya rugung mamayad;
Karing anti karen kailangan tang’ mingat
ban keta’ing corruption lubus nang mapatpat.
Buryan ta’ pa waring magbalik ing napun
a meging mitsa na ning graft & corruption
ing milalung gastus kaniting eleksyon?
Obat e ta’ misip aliwang solusyun
a nung makananung munlad ta’ panyulung
karing makataung dapat tang isubung;
A e ra kalupa ding nen mung eleksyon
lalto ken… at alang malino direksyon.
(A’yanti mo ining bala nang alalan
asna king kasipag makitagal-tagal,
pati na nung misan keng aliwang lugal;
Pero king sariling balen a beitan,
e ku asabi nung nanung kasangkanan
nung baket e ya pa mengangas tinagal;
Subali mu king e re ata pikasaban,
tabalu nung nanu ing tune dahilan!)
