OYAN, melaus ne pin yatang megulyan
ing pekamatas ta’mung diling opisyal
ning bansa, king ngeni na niti panyabian
a nu’ ing aliwa ala na keng lugal.
Lub ning limang banua niting pangasalpak
keng puestu antimong pamuntuk, e ditak
a kalaraman ing keya ta’ asapat,
uling yan asne king katinung maglingad.
Antimo ing ngana ala yang sinabi
king i BBM ing inindorso niti
bilang payntungul a maging presidente,
pero nanu’t e na pin lilingad ngeni?
Kabang milyones la ken asna karakal
mekakit keng ‘social media’ at ampo pang
mekapamasa pin karing pahayagan,
at karing keng radio makapakiramdam.
King i Bongbong Marcos ing talagang buri
nang keya pamalit tamu nung sakali
kumandidatu ya, uling yang apili
nang maging kalili a mayap a bini?
E wari ngana pa “paluklukan yu ku
mang migit ‘twenty years’ bilang pamuntuk yu,
e ku apatuknang ing marok a bisyu
ampo ing korapsyon ngeni king gubyernu.
Inya mayntun kayu pang metung a Marcos
a malyaring yalal antimong pamuntuk,
a paniwalan nang ya mupin ing bukud
king eganagana asandalan lubus”.
AT NGENI pin, oyan aliwa ne tonu
salita at kumpas i senyor Rodrigo;
nung nu’ kabud-abud rugu ining Bong Go
yang ngeni, anti nang kekata indorso?
At kwenta, e na ne kapartidung Sara
i Bong Go, uli ning i Bongbong ing keya
king KBL yang ken ngeni akasangga
nang Inday, inyasa’t (war) la ring mi-tata ?
At metung pang asna kaselan a bage
gewa na ngara ning mal tang presidente.
obat lalto ing yan ‘camaraderie’ ne
yatang Joma Sison a meto’ rebelde?
Kabang ya ing kwenta ken ‘commander in chief’
ding insanu pa mang kekatang ‘armed forces,’
inya e malaut datang ing penandit
i Digong kabilang da ne ken ding ‘wanted’?.
Asna karakal ing e mikakatulpak
a panyabian na ning pamuntuk tang berat;
pati na nung misan ding ken alang bulad
yabe ning balamu sugapa keng alak.
At nung ukulan nang Bong Go ing ‘asset’ ya
i Digong king keyang ken pamangampanya,
‘Mas makabubuting umatras na siya
‘this early’ upang di lumaking “gasto” niya.
Pagkat kung iasa nga lang n’yan kay Digong
ang panalo sa darating na eleksyon,
baka ni pang-apat sa ‘presidentiables’
hirap masungkit n’yan kapag di umurong.
Dahilan na rin sa ang inaasahan
niyang mag-aakyat sa mithing tagumpay,
baka ngayon pa lang ay nasa katayan
na ng matadero ang kwenta manok n’yan?!
