NUNG pota mung atin kang buri kanaku
Karin mu ku balung pagsaryan, kuyug ku
Yan, e masanting a ugali o bisyu
Uling kapamyasan king kaparang tau.
At metung pang e na kasasanting kuyug
Nyang panugali mung maki-panga manuk,
Potang ikang ating akalkal keng dapug
Ikang magbutaktak, makapasalikut.
Anti mo neng akung malangi paritan
Aba, e mu ku man buring pakiabayan;
Asilipan mu pa ing kakung panyatang
Pipimpin mung agad ing kekang kabiayan.
Pero, ngaku na pen… potang ikang ala
Tiktak ka kasiri pamaut pin ata;
Misan, atin na ku kilub na ning takba
Akakwa mu ku pang agagatas bigla.
Abe, kalusan mu ing matsurang lumo
A e maging guebnan ba’kang mitaloto,
Pablasang kumayud ka mang bengi’t aldo
Nung mapamyasa ka e mu ikanono.
Tula mu mo’ waring pisisitsitan da
At e pikasaban ding maka-kilala?
Agyang aku matning asabi ku keka
Alang tumula keng taung mapamyasa.
Antimo pin potang atin kang kailangan,
Karin mu ku balung king bale pagsaryan,
Iti e makatud a kararaptanan
Ning taung matapat makikaluguran.
Parabel e na’ku mu susukal a lub
King pamangawan mu a e na makatud,
Ibat ngeni aku na ing kusang matlud
King aku, ing keka tapat makikuyug.
Uling keka e ku bitasa mang ikit
Ing atin ka mu mang masabal agiang dit’
A katlung dake ning bungang kalambibit
King asna kalino a kanakung ikit.
Inia anti na ning pikakasaman ka
Ugali, ngara ring ken makakilala,
Tanggapan mu’t ali, Abe ing tutu na:
Aku man kuyug ku KATMU NA KU KEKA!
