Sabian mo nung ninu ngan ding parating pakiabayan mu,
At caibat: nung ninu ica at nanu ca klasing tau,
Ing sabian cu e magmintis – itabac mu caniang batu…
Antimong masalang aldo talus ku na ing dapat mu;
Iti king capilan pa man, pacatanda-tandanan mu
Casebian de ring macatua a’yala nang pamagbayu;
King nung nanu ing dapat da ding taung pane abe mu;
Ica… antimurin naman macanian cang siguradu!
Case nung ding barcada mu… masiba la caniang alac,
Natural king ica man calasing cang e patawac;
Uling nung ngamu canacu keng inuman e ca mapad,
Imposibleng maliari cang careti makipagpuyat;
Ing casing taung makiabe…misan pati keng e mayap
Cailangan yang makibage caring cayang maging casap;
Agawa mu wari namang caren ing e ca makiarap
Ngening ding cabarcada mu keng inuman la sasagad?
Keta, nung ding parati mung pakiabayan sugarul la,
Natural mung mabiasa ca namang talan cang baraha;
At nung keng capanecasan sane la at tutung biasa,
E melaut king ica man mabiasa ca king balu ra;
At uling e imposibling king maroc atake ra ca,
Mecad… e mu king macanian mabiasa cang gawang pera;
Casebian, king yang sugarul potang ala neng ipusta,
Canita ne maca-isip mamisali king e caya.
Nung king mapanaco naman carin ca batang makiabe,
Ninung keca ing e misip king dapat na e ca mabe?
King agia mang matunud ca’t king antiti alang male,
Matucsu ca ban manaco king kelambatan yung miabe;
Itang kilub ning aldo-aldo… icong mitatanud pane
Alang e mu abalu king calati-latian mang bage;
At alang manwala keca king ica e ca cayabe
King nanu mang paniaptan na… tikian me yan o ali me!
Nung ding kecang caluguran durugista lang mamaltuc
Arapat mu cayang e ca tacman agiang pasalikut?
At ulining nanu ya man, nung sobra na e macatud,
Misan agiang panulu ya maging lasun yang tibubus!
Dale, sabian ta’na keta king ica e ca dudurug,
Pero ninung maniwala king ica e ca makiambus,
Ngening ding pakiabayan mu picabaluan lang malicut
At mebiasang memanasdap uli na ning drogang salut?
Barcadan mo ring kriminal o pusacal a holdaper
Asabi mu waring ica e mu no’man cayabe ren
King carelang pamanasdap caring bangku ampon saken?
Uling cabud mekiabe ca karing maroc anti caren,
Ala na cang capupuntan maging mayap cang memalen;
Pati kecang pamibie-bie, ala nangcamasalesen;
Sira na ca panga-tau at e mu no’ alacuan den,
At pamagcamali mu pa siguradu ra cang paten!
Dapot ica nung king taung mayap a cararaptanan
Carin ca mapad makiabe o maki-barcada mu man,
King agia mang atin ca pang ditac a catarantaduan,
Salese ca panga-tau at magbayu pilubluban;
Natural mu king ica man macanian ca capupuntan;
Ing tau akilala me caring cayang pakiabayan!
Ninu ring abe ning Pari… e pin wari ding Sakristian?
Pakiabayan me yang taung igagalang da ring sabla,
Alang taung king bili mu a maliaring agad mimua;
At uli ning masanting ya pamakiutus king aliwa
Pati icang cayabe na carake ca ketang tula;
E na mo’ calupa nitang pakiabayan me yang ‘sira’,
King agia mang matinu ca mirame ca caniang tatsa;
Ken me lubus akilala nung mayap ya o e tula
Ing ninu mang pakiabayan sa maliaring icasira!
Sumangid nian munang diling paca-isipan mung mayap
Ya’ytang sana king nanu man dapat tamung mag-maingat;
Ing pamakipag-barcada, alang matsura na mecad
Balu mu lang pilinan ding nung ninung carapat-dapat
At keca e maging dalan king impyernu ba’cang mukiat;
Sana, ya’ytang akit de pa ing cayabe mung maralas,
King carelang panlalawe anghel na cang makipacpac
At king kecang pambie-bie ditman ala nong’ apintas;
(At keta nung ya ing maging salamin mu oras-oras,
Caya ca mie pasibayu ampon makilalang ganap!)
