I Pisuk, agya mang yan pilantud yamu
Pikabaluan yan keng kagaling mamiru;
Pelalung masakit gagawa nang biru
Neng mamalasa ya karing katukayu;
At e maili anya isipan mu tutu
Ing pamalita nang makakarug salu
Karas keng dibati e me kararagli
Asaul uling ning makaba ya sati;
Nung matuliran ne’t sinabing maputi
Ing nanu mang kule, yan e mu apakli,
Pablasang biasa yang mamitagni-tagni
Neng kadibati re madalas ding Pari
Ampo pa ring Pastor ding mialiwang sekta
A menasa agpang king kapanwalan na,
Negosyo mu kanu ing pangatatag da
Ding aliwa karen a magpakilala
A susuyu reti ing anggang agyu ra,
Pero ing katutuan banting magpaka-kualta.
At ing katutuan ning kasalpantayanan
Alayu king salu reti at panamdam
Ing tune aske ning tutung kabanalan;
Nung inya pelalung Pari king Pisamban,
Misan aisip na ing ta’ne subukan,
Nung iti talagang atin yang tetagan.
Karing ipnaral niti keng pulpitu
Kabang manyermun ya neng aldo Duminggu,
At keta ring kayang tapat a debotu
Pakatingiran dem ing kayang amanu;
At keta anti reng akakit ing Ginu
Karing selita ning Pari king publiku.
Dapot misan iting masalbahing Pisuk,
Nanu’t king Pisamban aisip nang linub
At king Kumpisalan malale siniklaud;
Kaibat itang Pari a payapa lukluk
Malumane nanung isitsit nang Pisuk
O ikumpisal nyan king bigla nang paglub.
“Among, e la ditak ding kanakung pete
Karing kitnan ku keng maulagang bage,
A keka buri kung pakibaluan tune”
“Nanu wari hijo sabyan mung manene?”
“Nung tutu pin ining panaral dang pane
Ding dakal, a ngara ating Dios a mabie?”
“Nanu’t akutang mu kaku ing bage iti”?
“Kasi, Among yan ing sangkan inya reti
Pemate ko’ ngan pin – at balang sumabi
Papaten ku naman keng baril kung ini;
Ika wari Among, kutnan daka ngeni,
Manwala ka naman king kekang sarili.
Ing atin pin kanung Diyos keting yatu
A kalupa rening taung pemate ko?”
“Aba, agyang dirit, ali ku, ali ku
Milulupa kata kapanwalan, hijo!”
“Salamat pu Among sigi mako na ku,
Keta na ku mu pu mayntun kalupa yu”
(Iti pu ‘joke’ yamu a kanakung dimdam
Karing mitutua keng kasalpantayanan;
At ala yang imbut ing sinabi kanyan
Nune buri na lang sukdan pilubluban
Ding kapatad tamung ngeni mangalinguan,
King Dios a sukat ta’mung matapat suywan!)
