Pilan neng aldo e patugut i Banung
Keng kalalakad na at aplit luluyun,
Umpisa king abak anggang gatpanapun
Mayntun aobran na antimong Janitor.
At uling e rugu tinuklu mang Grade 6
Keng pamagaral nian, asna king kasakit,
Ing ya kararagli akua nang makakit
Obrang e kailangan ing talas ning isip.
Makanian man dakal ya balung pagobran,
Ing obrang babai kabisadu na ngan;
At uli ning atin yang panga-bading yan,
Keng pamag-manicure biasa yamu naman.
Keng kalalakad na a’yalang direksyon
Asaganan ne’y Piyuk, a tau San Simon,
Kaybat pilan bulan na rugung luluyun
Mayntun obra, puera mu sa’ keng konstraksyon.
At uling ning deti mikaluguran la
Biklat nang agad ning Banung ing pake na,
At ngana pin “Piyuk, manintun kung obra,
E mu ku asaupan milub kang Mayora?”
“Aba nung obra mu ing kekang payntunan,
Ngeni murin agyu kung gawang paralan,
Ba’kang milub at e mu problemaan man
Ing paugtuan uling libri ka pamangan!”
“Ay kasanting pala, ilub mu na ku ne?
At magkanu kaya ing sueldu rang ibie?”
“Yan ing e ku balung sabyan masalese,
Kasi nung manyad ka, tabalu mu abe!”
Sabi mu manintun kang apipagobran,
Asaupan da ka, brod – libri pa pamangan;
Dinyan da na ka pin ot manaya ka pang
Suelduan? Abusu na, kuyug ing makanyan!
(Tutu pin naman eh, manintun yang obra
Ining Banung, asaupan neng Piyuk, nanu pa
Ing buri na niti? Libri ya komida
At mekad pati ing oras ning mirienda.
Kapusungan ya mu iting sinulat ku
O pikaylian ngara king simpling amanu,
Kasi ninu mo ing papagobran tamu,
A e ya manayang karampatan sueldu?)
Glossary: Talatinigan, Saldugan
Milub – matanggap, makapagobra
Luluyun – manintun, magdulap
E patugut – pane, alang tuknang
Asna – masiadu, milalu
Bading – bakla, binabae
Pake –sarya, lakad, nasa
Tabalu – e makasiguru
Ot – obat, bakit, nanu wari
Puera – subali, e mu sana
Dinyan – dininan, pigkaluban
Kuyug – kakaluguran, kabarkada
Abusu – sobra na, milalu, labis.
Kapusungan – biru, sisti, o ‘joke’
King salitang English, uling alang buguk
A makipagobrang pakananan mia kabud?
Puera mu ring maki-diperensia buntuk!
