Pilan neng aldo e patugut y Banung
Keng kalalakad na at aplit manintun,
Umpisa king abak anggang gatpaanapun
Apipag-aplayan antimong janitor,
At uling e rugu tinuklu mang Grade 6
Keng pamagaral na asna king kasakit,
Ing ya kararagli akwa nang makakit
Obrang e kailangan ing talas ning isip.
Makanyan man dakal ya balung pagobran,
Ing obrang babai kabisadu na ngan;
At uli ning atin yang panga-bading yan,
Keng pamag-manicure biasa yamu naman.
Keng kalalakad na a’yalang direksyon
Asaganan ne’y Piyuk, a tau San Simon
Kaybat pilan bulan na rugung luluyun
Mayntun obra, puera mu sa’ keng konstraksyon.
At uling ning deti mikaluguran la
Biklat nang agad ning Banung ing pake na,
At ngana pin “Piyuk, manintun kung obra,
E mu ku asaupan milub kang Mayora?”
“Aba nung obra mu ing kekang payntunan,
Ngeni murin agyu kung gawang paralan,
Ba’kang milub at e mu problemaan man
Ing paugtuan uling libri ka pamangan!”
“Ay kasanting pala, ilub mu na ku ne?
At magkanu kaya ing sueldu rang ibie?”
“Yan ing e ku balung sabyan masalese,
Kasi nung manyad ka, tabalu mu abe!”
Sabi mu manintun kang apipagobran
At asaupan da ka, libri pa pamangan;
Dinyan da na ka pin ot manaya ka pang
Sueldwan? Abusu na, abe ing makanyan!
Wapin naman, obra mu ing payntunan na,
Dinyan da ne, at yan libri pamangan ya;
Manyad ya pang sueldo? Yan, sisting makatwa!
(Alang turak a mabisa keng antita.
Pwera namu karing ken talagang alang
Kapamilya at/o kamaganak mu man
A malyari reting king bie asantungan,
Ding mabisa agyang libri mu pamangan.
Lalu ngening ing bie asna king kasakit,
E ta’ kararagli mu namang makakit
Apipagobran ken, bistaman dusuldit,
E tamu patugut mayntun magkapilit.
Nu’ ing kaulyan na nyan agyang libri mu
Kumida, mapilit ta’nang kumet rugu,
Kesa king mate kang danup, e pin tutu
Ing e ka mabisa at kabud na tango?
Iting lerawan ning kakung kawatasan,
Waman sisti mu’yti – e ta’ atawaran,
Ing yan malilyari ngening salukuyan,
King bie ring aliwang alang pilisunan.
Pablasang masakit na talaga ngeni
Ing bie, pasari ning mialiwa na kasi
Ing kasangkanan a mangabayat dili,
King yatung karinan, karin, keta’t keti!)
