PINAKASINUSUBAYBAYAN pa rin ng mga Pilipino ang mga programa ng ABS-CBN noong Abril matapos pumalo ang average national audience share nito sa 44%, base sa datos ng Kantar Media.
Nanguna ang ABS-CBN sa iba’t ibang panig ng bansa tulad ng Balance Luzon (mga lugar sa Luzon na nasa labas ng Mega Manila) kung saan nagtamo ito ng average audience share na 46%. Panalo rin ang ABS-CBN sa Visayas na may average audience share na 57% at sa Mindanao na may 54%.
Hindi pa rin natitinag ang pamamayagpag ng Kapamilya network sa primetime (6p.m.- 12m.n.) dahil sa average audience share na 48%. Bukod sa primetime, parehong umabante ang early afternoon (12nn.-3p.m.) at late afternoon (3p.m.-6p.m.) blocks ng ABS-CBN.
Mula sa 43% noong Marso, umakyat ang early afternoon block nito sa 45% noong Abril, habang apat na puntos naman ang itinaas ng late afternoon block nito na may 47% mula sa 43%.
Ang pag-akyat na ito ay dahil na rin sa patuloy na panguguna ng noontime show na It’s Showtime na may average national TV ratings na 15.3%, pati na rin ng mga programa sa hapon na Meteor Garden (15.3%) at Moon of Desire (14.5%) na parating nagwawagi sa kani-kanilang timeslot.
Nasungkit ng ABS-CBN ang 13 puwesto sa listahan ng top 15 programang pinakapinanood sa buong bansa noong Abril, kung saan itinanghal na numero uno ang Dyesebel (29.5%).
Ang iba pang mga programa sa listahan ay Wanspanataym (28.9%), Ikaw Lamang (27.8%), Maalaala Mo Kaya (27.7%), TV Patrol (25.8%), The Legal Wife (23.5%), Rated K (22.5%), Bet On Your Baby (22.2%), Home Sweetie Home (20.8), Mirabella (18.2%), Pinoy Big Brother All In at Be Careful With My Heart (17.8%), Gandang Gabi Vice at Goin’ Bulilit (17.4%) at ang pang-Sabadong It’s Showtime (17%).
Humataw agad ang pagbabalik ng nag-iisang teleserye ng totoong buhay na Pinoy Big Brother noong Abril 27 sa national TV rating na 20.5%. Tinutukan din ng mga manonood ang The Biggest Loser Pinoy Edition Doubles: Ang Bigating Pagtatapos noong Abril 26 na nagtamo ng 19.1%.
