ALA NE, minuli ne king banuang matas
ing banal a taung matibe nang asias
ning sabing king tangke ring aldo milabas
e na pepabusten mepanat, melagas
Pablasang ibat king anak yang maintang
king keyang dila e bitasang kinawang
ing salitang king bie na meging matimbang
at liguran migit king gintung kikinang
Pilan lang anti yang kawal ning amanu
a tune malingap at sinese ustu
king mana ta’ng sabi, a nu’ anggang sepu
ning bie na dilig neng lugud a masolu?
At penikuanan neng lalung apalabung
ing amanung sisuan karing bayung siglung
niting kasulatan a misusun-susun
nang pepalual anti waring tauling pamun
King amanung e na piglibe bitasa
king salitang dela ra ken ding banyaga,
bistaman biasa yang Inglis at Kastila
ampon aliwa pang e ta’ kasalita
Peka-maulagang diling sinulat na
ya’t e aliwa ing linikas nang Biblia
king amanu tamung kang Indu amana,
a penigobran nang e mu pilan banua.
Linikas nia naman pin king Kapampangan
ing diksyunariong Kastila ya kalamnan,
a’yalang mengangas o kaya migpagal
ibaldug de iti king amanung sisuan.
At yamu marahil karing anggang Pari
ing milikas karing mialiwang pangadi
a menasa inglis ba’rang kararagli
aintindian ding e binang mataluki.
E ya mapagtanam y Among Ven Samson
kenu man a keya mikasala napun,
uli ning bista man mabagsik a lasun
ing keya anti rang kanita pepainum
Ding mapilan a memalen Sto. Tomas
a keya neng bengi pane mamasibas,
yan busal nang salu niting Paring pantas
e na kinimkim waman sari kaplas
Ing basibasan de mismu ing kumbentu
a nu’ kanita ya ing Kura Paroku;
Nune tinipun no ngan ding digpang batu,
a inasad na king pasung sementadu.
At deti binalik na la Sto. Tomas
bayu mewala bie Paring mematawad
karing keng pusu na malalam yang sugat
ing memiuk at anti waring midalamat.
Dapot uling iting maki-kabanalan
a pusu ning Pari pigkalub na’na ngan
ing lusuk at ganap a kapatawaran,
mewas pati musing na ning kasalanan.
At nu’ pasibayung MIBUSNI ING BANUA
karing memalen niang mamatawad na ya
i Among Ven karing keya mikasala,
sumangid ning keya depat dang matsura.
Iniasa’t bayu ya king BANUA MINULI
i Venancio Samson ikua nang asubli
king Ginu ing keyang bie antimong Pari,
antining ing sabla Keya ngan misubli!
Tang’ Ven ipagkalam na ngan sana keka
ning Dios ing lubus at tune alanangga
a ligayang dasan mu king karinan Na
ngening king siping Na mismu atyu na ka!!!
