KANITANG abeinti ya ing salukuyan
a bulan ning Julio, dinian neng parangal
ning king HAU Center for Kapampangan
ing metung a watas king kulturang menan.
A meging popular king metung nang adle
ning musika ampon sunis pamigale
a makayaliwa ing beluan nang tagle
karing poeta at kabud mu gagale.
Ing keya yapin ing ausan dang pulosa
o basultu ngara kanitang minuna,
a nu’ kawangis nia naman ning poesia
ing balangkas na at pamirima-rima
Pero impromptu reng dadalit at igkas
ding pulusador a king balen sinikat
a panimunan ning mabinti nang anak,
ning pikabaluan a balayan ning Porac
A magbansag Totoy Bato king publiku
dapot ing talagang lagyu na Rodolfo
at Laxamana ya tune apelyidu
iting mipopular a kaprobinsya tamu
At emu keti king kekatang probinsya
ya meging idolu re ken king makatua,
nun’e pati na ring dakal a dalaga
ampon aliwa pang mapad keng pulosa.
At agiang keng dane parti ning Middle East
miras la kanita ring keyang ‘cassette tape’
a iparala ra karing ‘contract workers’
ding keti melakuan a karelang misis
Ban maging libangan da kaibat megobra,
lalu na neng oras da reting paynawa,
pablasang ding paka-‘voice tape’ nang pulosa
masanting la ampon binang makayama.
At e mu keng parting Middle East la miras
ding ‘voice tape’ a keya lalung pepasikat
karing karatig bansa ning Pilipinas
nun’e lalu na Guam at Isla Marianas.
Makanian yang meging kapopular bina
i Totoy pati na keng aliwang bansa;
Ing malagung bosis na damdaman de pa
mipapaindak la keng sobra kasaya.
Inia ketang bengi ning Julio abeinti
a mika-‘tribute’ ya ing taung mesabi
kapamilatan ning Pamantasan Holy
na ning Culiat a ‘World Class City’ na ngeni
(At nu’ kayabe ya ing kagalang-galang
city mayor Edgardo ‘EdPam’ Pamintuan
ampo ing ‘First Lady’ nang i Atsing Minyang,
karing marangal a bisitang dinatang).
Miganap lalu ing saya at kusuelu
ding talagambul king kekatang amanu
a e patugut keng pamanyese ustu
ban e malumpawi babo na ning yatu.
At inyang mesabing petsa ning pamiduang
parangal kang Totoy ning Holy, mirinan
masampat a oras ing pamangilalang
dalise a sukat keya mipagkalam.
Pablasang i Totoy Bato keng bili na
karapatdapat mu ing kabang mabie ya
mibie itang dapat mipagkalub keya
bilang galame ning arte at kultura.
At e nung kapilan ya marimlang bangke
karin tamu iduang itang dapat ibie;
Balu na pa wari potang yan atyu ne,
makakutkut lalam, sukad anam a pie!?
