ANG PDEA Summit na ginanap sa Clark
nitong ilang araw na nakalilipas,
sa pamumuno ng pinakamasipag
nating gobernador – (na ‘Nanay’ ng lahat
ng Kabalen) – at ni Director General
Cacdac ng PDEA’y mahalagang bagay
na marapat bigyan natin ng matamang
pansin ang lahat ng ibinahagi riyan
Ng mga Alkalde sa Unang Distrito
at ni Congressman Yeng – kabilang na mismo
si Judge Omar Viola ng RTC rito;
At ibang bisita ay mapuri mo
Sa kanilang naging pahayag sa ‘Summit’
hinggil sa paglala’t dulot na panganib
ng shabu – kapagka di nagkapit-bisig
ang lahat upang yan ay masugpong pilit
Kung saan ang bawat isang mamamayan
ay dapat tumulong sa pamahalaan,
sa pamamagitan ng simpleng paraan
na ma-itimbre sa kinauukulan
Ang anumang bagay na kaduda-duda
na mapapansin n’yan sa barangay nila;
At yan ay iriport natin sa pulisya,
NBI, CIDG at/o iba pa.
Para manmanan at magawan kaagad
ng kung aksyon na karapat-dapat,
Upang ang iligal nilang aktibidad
di makapinsala sa’ting komunidad.
Ang suhestyong dapat o kinakailangang
alamin muna ng nagpapa-renta riyan
ng apartment at/o puestong paupahan
ang nagnanais na umupa sa lugar
Ay isang mabisang ‘anti-campaign’ para
maiwasan natin ang may maka-upa
sa ating barangay, na salbahe pala
at mayrung ‘criminal record’ sa pulisya.
Kaya para maging ligtas sa panganib
o anong bagay na di kanais-nais,
Ano’t hindi yan ang patakarang pilit
nating ipairal at sunding mahigpit?
Kung saan ang bawat gustong mangupahan
yy kinakailangang munang ipaalam
sa tanggapan mismo ng Punong Barangay,
para sa masusing pagkakakilanlan
At kung saan sila ay marapat nating
hingan ng patunay kung saan yan dating
nanirahan, at may kaukulan manding
mga papeles na sa NBI galing.
Nang sa gayon bago makapangupahan
ang sinumang dayo sa ating barangay
ay determinado tayong di kriminal
ang gustong tumira sa’ting pamayanan.
At upang pati na ating mga anak
ay mailayo sa bisyong illegal drugs,
kinakailangan din nating magpatupad
sa bayan-bayan ng mga ‘curfew hours’
Partikular para sa menor de edad,
na s’yang kadalasan ay minamagdamag
sa nakararaming mga ‘computer shop’
na walang tiyak na pagsasarang oras.
Dala na rin nitong walang pumupuna
sa mga yan kahit na inu-umaga;
Kung kaya nga’t uma-abuso ang iba?
Na aywan kung sila ay nagsasara pa!
