Bunsod ng marapat at lubhang mahigpit
Na pangangailangan para mapabilis
Ang pagtugon ng ‘delivery of justice’
At saka iba pang mga ‘judicial needs’
Ng Mabalacat at bayan ng Magalang
Na walang sariling Korte Municipal,
Kaya marapat lang na sila’y mabigyan
Na mga ‘trial courts’ sa kanilang lugar
Ayon kay Congressman Carmelo Lazatin
Nitong ‘1st District of our beloved province’
Kaya naisipang magsumite ng Bill,
Na direktang tumutukoy sa layunin
Ng butihing Kinatawan (ng Pampanga)
Na magkaroon yan nitong hiwalay na
Husgado sa bawat isa sa kanila,
Kaysa sa Angeles city pa magpunta
Para lamang dito magsampa ng kaso
O harapin n’yan ang anumang asunto;
Na lubhang malayo at magastos piho
Ang bumiyahe sila paroon, parito
At napakalaking abala rin naman
Sa lahat ang sanhi ng sila’y wala niyan,
Lubhang mahalaga sa naturang bayan
Ang magandang panukala ni Congressman.
Na sukat bigyan ng positibong pansin
Nitong ating mga ubod ng gagaling
Na Representante sa Batasan natin
Hanggang sa umabot ito sa 3rd Reading
At tuluyang maging isang Republic Act
Upang ang Magalang at ang Mabalacat
Ay di na kailangang dumayo at sukat
Sa Angeles – at d’yan lalong makaragdag
Sa bilang ng mga kaso sa Hukuman,
Na ang iba’y halos di nabibistahan,
Dala na rin nitong kadalasa’y kulang
Ng sapat na oras upang maharap yan
Maliban pa kung di man si Judge ang ‘absent’
Sa oras ng ‘hearing,’ madalas ‘postponement’
Naman ang sanhi kung bakit laging ‘reset’
Ang bista, nang dahil sa ibang ‘appointment’
Nitong alin man sa magkabilang ‘counsel’
Na ni pasabi ay hindi nagparating
Sa Korte o sa mismong kliyente na rin,
Kaya postponed tiyak ang ‘scheduled hearing’.
At ang pobreng kliyente sa puntong naturan
Itong palagi nang sumusuntok sa buwan,
Pagkat bayad man siya para sa ‘appearance’
Ng kanyang attorney ay bale wala lang.
Kaya nararapat na masusugan din
Ng pinakamasipag at ‘Most Outstanding’
Na Kinatawan ng lalawigan natin
Ang isinusulong nitong magandang Bill
Na kung saan dapat mabigyan din naman
Ng proteksyon itong mga may kaso riyan
Sa ating husgado sa pamamagitan
Ng pagtatakda ng mga panuntunan.
(Gaya na lang nitong bagay na nabanggit
Na talaga namang di kanais-nais;
Sana huwag naman din nating maging ‘practice’
Ang sumingil kung di aktual na nagamit
Pagkat sadyang mayrun din naman talaga
Nitong ang bansag ay “lagareng hapon” ba?
Na kahit di kayang harapin lahat na
Ay tinatanguan para lang kumita.)
Sa puntong nasabi ay napapanahon
Ang panukalang Bill ng butihing Solon;
Na kung saan pihong liliit na ngayon
Sa lungsod ang kasong laging nakabunton.
Pagkat ang Magalang at ang Mabalacat
Ay mabibiyayan na rin yan sa wakas
Ng sarili nilang ‘court of justice’, oras
Ang panukala ni Tarzan maging batas!
