Carin Divisoria dinayu ya misan,
king ban mag-usyosu ing mayabang a Juan;
Buri nang akit nung atin ping catutuan
ing dacal la reti carin king Tutuban;
At uling talagang buri nang subucan,
king cayang sarili… atin yang belacan,
a nung macananung aracap no’ mulang
ding peca-mabilis caras keng makanian.
Tinali neng letting at penapan keta
ing cababaywan nang mamuklo pitaca;
Dapot uling mecad meca-ulata la,
ala mang mengangas lepitan de keta;
Mupin, ing miliari – kemamaulian na
icua nang mepagal keng calalacad na;
Angga king aisip na ing magpainawa
cabang panalbian no’ retang midadama.
Penanandit, ating banayad linele
bandang cagulutan, mekialbe-albe;
At uling ining Juan miama yang manalbe,
melibang yang ustu; at king e na male,
iting casiping na keta icua na ne
ing cayang pitacang ipanapan pane!
Iti palang din’tang… ing leting petad ne,
nung inia icua ne keng pacacalale!
Tauli na, ala no’ ring caya minducut
aniang capcapan ne ing bulsa nang gulut;
Ing bucud mitagan leting a caputut,
a macatali king sinturera gulut;
At kanita niti atalastas lubus,
ing mecad ita ning pasimpleng dinucut,
king cayang pitaca ala nung e cabud
ya itang king siping na parating mangamus.
Mapnamu pin keta atin ya pang pera
king bulsa nang relo nitang pantalun na;
At nung ali pati ring pamasahi na
icua rang atange ketang oras a ita;
Macasali ya pa namang saganan da
ding atlu nang anac king penabilin da;
Pero nanu caya rugu’ing asali na
caring casacmal a purus namung barya?
Miglacad-lacad ya at menintun agad
a maliari niting yuli caring anac;
Angga king mecakit yang magtindang ‘ice drop’
a ngeni na pamu atacman a sangcap;
At keta caibat nang apilasang mayap,
“Caniaman na nine?” nganing cayang gingcas;
Pikyo na ngan niti’t lilan na ngan king bag,
at ketataglus nang minuli ping agad.
King cayang panluslus kebatingan ya man,
bali ala mu at e na penamdaman;
Ninanu ne pin mo nung meducut ya man,
puru lang mamesus ding carin na lilan;
At saca e uling macabuclo ya yan,
ta’ne pecasapac caring perang dacal;
Ding keraclan pala listahan lang utang
caring picuanan na niting tacalanan.
Caras na carela… e pa man mipanic,
king cayang esposa mengaya neng aplit;
Ngana: “Divisoria, ngeni cu pa ikit,
ing anggang panindang nu’ ca macatipid;
Mupin, carin pala nung e ca mabilis,
careng mandurucut malaslas ca buldit!
Apalac-palac mung acua re ring diaskis
ing cacung pitaca king e cu man malit”?
Ing gewa cu namu caibat cung meducut
kilub ning palengki e na cu miglibut;
Caibat cung asali ing ken macadatuc,
kilub na pin niang bag cacung pecabalut;
Lawen mu pala “jo”… atin cung selicut
siguradung ini aburian mung lubus!
Dapot cabuclat na: Ding meyakit cabud,
talnanan na la mu’t papil a melasug!
(Casiri da naman detang Mandurucut
Obat pati ‘ice drop’ icua rang aducut?)
