Kung ani Councilor Mike Tapang ng Porac:
“It will take three to five years” bago raw ganap
Maipasara ang ‘piggeries,’ at lahat
Ng kauri, sa ‘subject’ na komunidad;
Na apektado sa masangsang na amoy
Ng dumi at etsas ng alagang baboy
Nitong sa tingin natin ay ‘untouchable’
Ang mga may-ari kaya tuloy-tuloy
Ang ‘operation’ niyan sa kabila nitong
Matinding hinaing at saka reklamong
Idinulog na sa tanggapan ni Mayor,
Kay VM at saka sa ilang Councilor
Nangangahulugan na ya’y di maaring
Mapahinto basta o kayang galawin
Ng alin mang lokal na ahensya natin,
Bunsod ng kung ano na lingid sa atin.
Pagkat ano’t hindi maipasara kaagad
Ang anumang bagay sa isang komunidad
Na posibleng ikapahamak ng lahat
Ng nasasakupan sa lahat ng oras
Nitong alin man sa ahensyang marapat
Umaksyon upang ya’y maresolba agad,
Partikular na ang Alkalde ng Porac;
‘If no one is behind that nobody can touch?”
Kundi man posibleng ang may-ari mismo
Ng mga ‘hog farms’ na inirereklamo
Ay opisyal sa naturang munisipyo;
Di malayong sila’y may kakampi rito.
Ano’t kailangan pang umabot ng taon
Bago maipasara ng butihing Mayor
At/o nitong Sangguniang Bayan itong
Mga pesteng ‘hog farms’ kung di dahil doon?
Gayong ito’y kaya namang ipasara
Ng kaagad-agad kung gugustuhin niya?
Liban na nga lang kung makapit talaga
Ang mga may-ari na maimpluwensya!
Na bago tuluyang makanti man lamang
Ay sa butas ng karayom magdaraan
Ang anumang prosesong kinakailangan
Para mapaalis sa kinalalagyan!
Kasi kung talagang ni ‘permit’ ay wala
Umanong inisyu ang opis ni Kaka,
Papanong ya’y basta naitayo kaya
Nang ni di man lamang tumimbre din yata?
Maging sa tanggapan man lang ni Kapitan
Na nakasasakop sa mismong barangay,
Kung saan naroon ang naturang ‘hog farms,’
Na ‘subject’ nitong ating tinatalakay;
Na nakarating na rin sa Gobernador
Ang isyu, at inatasan na si Mayor
Upang gumawa ng kaukulang aksyon
Para ‘total shut down’ ng operasyon;
Ng mga yan, pero ayon sa pahayag
Ng Konsehal na nabanggit sa itaas,
Maghihintay pa raw itong taga Porac
Ng ‘3 to 5 years’ ba bago nila ganap
Maipahinto yan? Aba’y hindi yata
Pasado ang ganyang ‘statement’ ni Kaka;
Kundi bagkus ‘No Good’ pagkat hindi tama,
Kumbaga sa sagot, sa Titser ng bata!
