Sa mga sandaling sinusulat ko ito,
Dapat sana’y nasa Larissa, Greece ako
Kasama ng mga ‘great poets’ ng mundo
Upang daluhan ang pagtitipon dito
Ng makatang kasapi sa kapisanang
‘United Poets Laureate International’
Kung saan ang inyong abang kababayan
Ay nakadalo na ng di lamang minsan.
Sa ‘World Congress of Poets’ na ginaganap
Sa iba’t-ibang panig ng mundo, magbuhat
Nang ang kapisanang ito ay itatag
Ni Amado M. Yuzon ng Pilipinas.
Kung saan kaanib nga sa kapisanan
Ng mga ‘world’s poets’ ang inyong kabayan;
At sa pagtitipong ito ay kabilang
Sa mga makatang dadalo sana riyan.
Pero nang dahil sa napakabagal na
Proseseo ngayon ng pagpila’t pagkuha
Ng pasaporte ay hayan, napurnada
Ang biahe ko dahil sa ganyang sistema.
Na pinatutupad ng DFA ngayon,
Partikular na r’yan sa tanggapan nitong
Nasabing ahensya dito sa ‘3rd Region,’
Na masahol pa yata sa usad pagong
Ang pagpapatakbo ng mga opisyal
Sa pag-asikaso at pag-proseso niyan
Ng mga papeles na kinakailangan,
Upang mapabilis nila ang ‘issuance’
Ng mga ‘passports’ na kailangang matapos
‘In a week’ lang dapat – at di itong halos
Tatlong buwan yata riyan itong inaabot
Bago makuha ng ‘applicant’ ang passport?
Naturingan kasing may tinatawag na
‘Overtime’ umano para (bumilis ba?)
Pero ano’t “2 months” pa rin yata kwenta
Ang ipag-hihintay bago yan makuha?
Gaya na lamang ng kaso nitong atin
Na ipinasok ko noong buwan ng Abril;
Gayong ‘renewal’ lang, pero hindi pa rin
Makukuha ‘within 1 month’ sabi sa ‘kin.
Eh ba’t noong araw na bago-bago lang
Ang pagsa-Saudi at pag-‘abroad’ kung saan,
Yan kapagka’ tinawag po nilang ‘overtime’,
Pinakamatagal na ang ‘one week’ minsan?
Kung kailan pa ba ‘computerized’ ang lahat,
Saka bumaba ang ‘output’ nitong dapat
Tapusin sa loob ng ‘twenty four hours’
Ng taga DFA nating masisipag?
Na aywan kung ano ang sanhi, at bakit
Lumalaon lalo yatang tinitipid
Ng ilan ang dating sigla nila’t bilis
Sa pagtalima ng kaukulang ‘duties?’
Kung kaya imbes na bumilis kumbaga
Ang ‘deployment’ pati pagtatak ng Visa,
Nitong nakatakda sanang bumiyahe na,
Kadalasan bigong maka-alis sila.
Gaya na lang nitong nangyari sa akin,
Na di naisa-ayos ang kakailanganin;
Ano pa nga ba ang marapat kung gawin
Sa ‘pabaon’ na ini-abot sa atin?
Ng ilang katoto at mga kasangga,
Kundi isauli ang ‘pabaon’ nila?
Upang sa gayo’y di masabi ng iba
Na si Mr. Garcia ay “MEDIAN” din pala!
