Inyang saliwan neng Mr. Levy Laus
kang Ka Tony Salenga ing Pampanga News,
Pilan pamung bulan ing milabas alus
mipabalita ing sera da nia kabud.
King uli na yata ning Editor mismu
atin yang sinulat iting artikulu
A meka-irita king ‘publisher’ kanu
Inyasa’t ing utus manyara, impromptu.
Mipaintagun aku ing keng ‘Arts and Culture’
King opis nang Oca ing anting gagambul,
Kaibat ning ‘assignment’ ku HAU, tyempung
Inagkat da ku keng PUNTO Central Luzon
At akayabe ke ing PUNTO Editor,
Of whom is none other than Caesar “Bong” Lacson,
A kabilang karing e mu keting Rehiyon
kikilalanan dang ‘writer’ a ma’valor’.
At agyang ing pika-baluan Macky Pangan
a kolumnistang alang kikilingan,
Yagkat na ku niti ban makisingkilan
pago karing Mayors keti Kapampangan.
At angga man ngeni ken pa muring PUNTO
Central Luzon News ku pa murin aktibu
King nanu mang bage a babie kusuelu
partikular ngening mig-otsenta’y singko ku.
At angga’t agyu keng ibuklat marahil
ing ‘computer’ banting igulis pa murin
Ing akasanayan a makaparikil
King Dios at kaparang tau, e mapigil.
Ing kakung pakamal king gintung pamana
ning kakung pengaring lalaki, keng bie na,
Bista’t migyari ku mung Elementarya,
paninap kung mika-lagyu mekilala.
Ing kakung pengaring lalaki e ku ne
yan akagisingan king maluka ming bie,
Pasari ning Kaduang Gyera apate re
ding Hapones uling apagkamalian de.
Biahero ya’y Tatang ku nyang panahun da
ring Hapon nung inya ren sindalyan da’la
Ila ning kasiping ming bale kanita
a magkang kabilang la karing guerilya.
Wayta pin, e ku ne akagisingan mang
mabie i Tatang ku inya e ku tikman
Ing bie agyu na ku rugung papagaral
Ima ku, uli ning sobrang kakaluluan.
Mig-‘high school’ ku man, kaputut mu rugu
o atlu kung bulan, at iti libri mu;
Uli na ning ‘from Grade I to VI’, aku mu
ing ‘top’ keng klasi at iti ya ing tutu.
Bigu man ing kakung kanita paninap
a nasang kamtan ku inalduk ku’ing salpak,
at ing panlalawe karin ku tinangad
king marayu a nu’ maputi ing ulap!
At ing pasalamat ku binang maragul
a KEYA malugud, banal a MINIAKLUNG,
Ing agyang ala kung king bie ku atipun,
Lalam Nang patnube e ku Mibakulkul!!!
