“Ingkong” nganing metung karing kakung Apu
Paniwalan yu ing linalang king yatu,
Atin ya naman pung e agawa kanu?
“Nano’ ngakung kaya masyas mengamanu,
Patugut ka bolang keng kasalbayan mu;
E me pakikiabe pati Apung Ginu”!
“Aba, Ingkong ali,, e ku pu magmulang
Ing pamalita ku alang kasalbayan”;
“Paynawa ka Pudung, e mu ku paglokwan”
“Ay Ingkong, kapilan daka mo’ silbayan?
Dindam ku mu pu yan karetang susugal
Nung inya aisip kung keka ikutang”!
“Lakwan mu ku Pudung, emu ku pakyabe
Keng salitang e mu ikakayap keng bie”
“Ingkong ing dindam ku tutu naman pu, eh”
“Nung ninung sinabi kalupa meng luse”;
“Ing sinabi kaku, Ingkong kumpare ye
Nung inya naman pu ya paniwalan ke”!
“Ingkong, maniwala tamung ing Dios Igpa
Yang king yatung iti ing linalang kusa,
Puera pa king tau at king sabla-sabla
A malyaring akit keti king masala;
Pero, ngaku na ping keka mamalita
Atin pung memukud a e na agawa!
At iti pu Ingkong, e ku balung sabyan
Nung e mababasa karing kasulatan;
Pero aku agyang nan’ ku mang sanakan
Paniwalan ku pung ing Dios a Miglalang
Ing Ya, atin ya ping e Na agyung gawan;
At iti, ya kabud: E BIASANG MAGLARAM!
Sermun nang Ingkung
Nung ngeni me pamu pilit babayutuk
Ing kuayan a binang mataram na suksuk
Yan king pamalak mung agawa meng paud
Emu ne apande king buri mung alkus;
Uling angga mu king mabunglu yang lubus
Nung iti pilitan me pang ibaluktut.
Pero kasebian pin nung kabang mura ya
Yan painut-inut meng inungyung keta,
Agawa meng paud, parase garosa
O nanu mang buri mung maging alkus na;
At iti maliaring maging gabe me pa
Paniatang ning aldo a magtukud na ka.
Makanian mu naman king meto’ penganak
A e miyungyung king ugaling masampat,
Yan agiang nanan meng aralan keng mayap
Magkasakit na kang king ustu me yanad;
Pablasang nanu mang bage e meyagap,
Angga mu king iti keng matsura miras.
At mekad nung pilit me pang iti yungyung
Ban king anino na akua mung salilung,
E malaut miras itang ika mismung
Tinanam kaniti akua mu nang lutung
Keng pangabilad mu kilub patingapun
Nung yang asahan mu a maging dalungdung!
