Timawa ta’na keng antimo ing bili
Ta’ngeni a’yalang keliwan nung wari
King tilbug keng tansu a mababang uri
Ing panlalawe ra keka ring maputi?
At nung nu’ atiyu i Sam kagulutan
Ning telon at aplit neng dirikta i Juan
King nanu ing sukat na pin niting daptan,
Sumangid ning atin tamung kasarinlan.
Puera king antimo ing bili nang Seng Hua
Na atin mu namang matuling a nasa
At e makatau king ba na mung akua
Ing minang laru king sarili tang’ bansa.
At nu’ miayaliwa nang kaparalanan
Ing pamangawan na ban pamatakutan
Ding kapatad tamung keng dagat manasan
Banting asolu ing kadayat-malatan.
Inya makananung e tamu asabi
Ing itamu atin tang pamag-sarili,
Nung sumangid na n’yan king aldo at bengi
Mamigaganaka tamu ping parati?
King uli na pin ning e tamu pa ganap
Mikalabyus karing kukong rang matatalas
Ding mapanalipan, beinte kuatru oras
Magumasid ibat keng sumangid dagat.
Uling waman atin tamu ping sariling
Mamuntukan ken a pawang mangagaling,
Pero apadurut nalang Sam at Xi Ping
Kapamilatan ning armoniang masanting.
Inya oyan iting e mayap dang nasa
A yasakmal deti batal iting bansa,
Nung nu’ kanita pa pin ken agagawa
Ing anti kanyan a pamagsamantala.
King puntong mesabi nanung katimawan
Ing keti ngeni ken malyaring aligan
Nune ing kealan nang ken katatagan
Ning bansa king keyang katatalakaran?
At nu’ e patugut ken ing bansang Tsina,
King e na makatud a pamanyaptan na,
Waman dening isla e no’man pin kaya,
At Pilipinas ing sasakup talaga.
Uli namo galang ning nung wari sa ken
Karing ayup, pipit ya ing mal tang’ balen
Inya mamalatian na la ring memalen
A e na balu ing kapasidad da ren.
Itamung palipi da ring Maharlika
Bayu i Magellan sinanglad king bansa,
At nu’y Lapu-Lapu ya ing sinagupa,
Ene inatrasan keng pamakidigma.
At agyang ding Hapon e no’ inatrasan
Supremo Luis Taruc niting Capampangan,
Angga king i Heneral Yamasaki ya nang
Kusang sinuku nyang e ne mingut-ngut yan.
Inya naman agyang asna king kalati
Ing lawe da reting kanwari kakampi,
Agyu ra ka tamung sakmalan, yan ali
Da agawa uling dai tang komanggi.
A e ta’ kapilan man maging alipan
King sariling bansa king kapilan pa man
Sapat na’yng milabas a e na ken miuam
Maralpak ing bitbit tamung katimawan.
Uling e ya pa man midalpak keng bansa
Ing insanu pa mang matuling a nasa,
Mete tana’t pawang makatalinda
Keng gabun a nung nu’ misalwak ing daya!
