Kanyamanan ning tudtud ku babo ning garosang laun
Lalam nitang pun sampaluk a marimla’t masalilung,
Kabud-abud namu keni dindam kung midadapitun
Ing alang kamunan-munan a sapito na ning ayun;
At keta ing dane kayli ning Pampanga, medalumdum
King paytas a kule abung biga a mig-telapayung!
Ing bunduk ning Pinatubu a maluat nang e matatdas
Ya pala itang piyaglon da busal nitang alingasngas,
Kabang makabatyo la ngan dane a nu’ itang ulap
Lahar pala ing samut na a susulpit atmung katas;
At kambe ning tikatik na ning uran a malapanas,
Mapilan mung minutu ita – king marangle linaganas.
King agya mang kaugtuan ning aldo ketang oras a ita,
Penandit mu meging pisak king mabilug a probinsya;
Inya naman pati saken a magbyahi keni’t keta
Memandal at memaglele karing rampa ning kalsada;
Uling itang labuk lahar a dagpa king arapan da
Kakapul king windshield deti’t penandit mu makapal na.
Mibalita karing radyo king ing balen ning Baculud,
Ya ing peka mas matinding mitambunan ketang labuk;
At waman king minuna nang panulandung nitang laput,
Ding aliwang baryu niti e la mepinsalang lubus,
Panyatang ning bagyung Mameng kanita la ganap limbug,
A’yantimo’ing Cabalantian a malalam pangakutkut!
E mu libung ektarya ing palayan a ta’na pete
Ning kinusad a mapaling lahar karin king marangle;
Nung inya ding ortelanu a sadyang mapayapa bie
At maratun mu bili king sariling pibale-bale,
Deti ilang peka-grabing miyapektuan a pagkabie
At ketang penandit a ita melubas king sablang bage.
Pinsalang maragul keta, keni’t karin ing milyari
Karing sibabalang balen a disan ning balas a iti,
Uling bista’t e lahar ing kinusad king sakup deti
Albug namang misnang dagul ing kimtan dang peka-grabi;
King aslagan – ing San Simon, ing Masantol, dane Mauli
At king Guagua at Sasmuan – itang peka-mas matindi.
Ing Angeles – king minunang bugsung datang na ning lahar,
Maragul a pinsala ing digpa king mesabing lugal;
Uling pelalung istasyun ning Rabbit king kabalenan,
Ikwa nang alasak niti king balas a tigtug na nyan;
At maging ding tete batu a’yantimo ing Abacan,
Inanyud namu naman ning masalusung danum uran.
Nanupata, kulang namung ing balen e ya melumpu
King pinsalang belasbas ning bulkan keti kekatamu;
Dapot uling matapat ta’ kapanaligan king Ginu,
At atin lang malasakit ding kekata gugubyernu,
Ing “Mega Dike” a pangambil king albug a lampas tau,
Megawa ya ban ing danum ilisya na kekatamu.
At ngening king dalisdis na niting masangil a bunduk
Ikwa na nang menapnap ning mengasalalak nang labuk,
Datang man ing mangasikan a uran ken, e na kabud
Magus antimo ing sadya itang lahar a metudtud;
At pilan mang bagyu mekad ing keti bigla nang marug,
Mapalyaring danum namu ing payndalan a mabaldug.
Uli niti, mapawi nang lubus ing memale sindak
King balayan a tikusan na keta ning mayling abak;
Inya naman ngening ala neng musing ning kalamidad,
Memanuli no’ ring dakal ban ken manuknangan ganap
Pablasang paniwalan dang kagulutan nitang ulap
Atyu karin ing masalang Aldo makasadyang sunlag.
