FORT MAGSAYSAY, Nueva Ecija (PIA) — Nagbigay ng mga gamot laban sa Covid-19 ang pamahalaang panlungsod ng Palayan sa 7th Infantry Division (7ID) ng Philippine Army.
Personal na tinanggap ni 7ID Commander Major General Andrew Costelo ang anim na kahong Molnupiravir, anti-viral drug para sa mga nagkakasakit ng COVID-19 na inihandog mismo ni Mayor Viandrei Nicole Cuevas.
Ayon sa kumander, makatutulong ang mga natanggap na gamot bilang paghahanda sa anumang maaaring maidulot ng Covid-19.
Ito aniya ay mapakikinabangan hindi lamang ng mga kasundaluhan, personnel, yunit ng dibisyon kundi pati ng mga mangangailangang mamamayan partikular ang mga naninirahan sa loob ng kampo.
Kaugnay nito ay lubos ang pasasalamat ni Costelo sa pagsuporta ng lokal na pamahalaan sa buong hanay.
Ipinahayag naman ni Cuevas na patuloy na magiging kaagapay ng hanay ang pamahalaang lokal sa paglaban sa Covid-19 gayundin sa paghahatid ng iba’t ibang serbisyo sa mga komunidad. (CLJD/CCN-PIA 3)
