KANITANG ing bansa dilpak de at sekal
Ding Hapones karing gamat deting bakal,
Karin king Bataan a nu’la mipalpal
King aldo at bengi rang pamakipagkal
Ding kang Sam ampo ring kekatamung kawal;
King uli ning puyat, danup ampon pagal,
E meluat ikua na ka’tamung asakmal
Ning Hapon, pati ing kalaban nang mortal.
A’yala’t aliwa nune’ing Amerika,
A makabase ken king bansa kanita,
Nung nu’ uling migit la sikan a puersa
Deting sinalake a katunggali na,
Kilub na ning alus ala mang pabanua,
Ding Hapones ilang migwagi king giera;
At itamu itang mitangab king mua ra
Ding Hapon a’yalang pusu at kaladua.
At detang mitagan a likua’na keti
Ning kuenta Commander da ring US Army –
Heneral McArthur e mingut-ngut pati,
Karin king aliwang bansa ya kampanti;
At i Abad Santos, (a bayaning sugi)
Ing dekap da’t buring pilitan ban iti,
Sumpa lalam na ning bandera da reti –
Bilang ‘puppet,’ dapot e na tinggap niti.
Angga na king pete re ping alang laban
I Don Jose e ya migbayu dit’mu man;
At uling lipi yang tune Capampangan
A ngara pin ating likas a tepangan,
Angga na king tauling pilit deng pasumpan
Lalam dang Bandila ring mapanalipan,
Ing kang Pepito na matatag gingkas nian:
“Ipakit mu karen, matapang ka naman!”
At niang misaldak neng lubus king Bataan
Ing puersa ding kawal tamu at ding kang Sam;
Bista’t sinuku la reti king labanan
Kambe ning Bandila tamu at ning kang Sam,
Imbes ituring da’lang ‘prisoner of war,’
Ding kusang sinuku at e na lalaban,
King ditak a e ra buri deting Sakang –
Itomba ra niamu ing e na mitakbang
Karing alang lunus pepalakaran den
Manibat Bataan anggang istasyun tren
Ning MMR ken king peka-sentrung balen
Ning Pampanga, uling ding aliwa karen
Ken pang kaminu a karelang babaslen,
Papunta king (ngeni asensadung balen
Na ning San Fernando) ing katlung dake ren
O migit pa gisan da lang pemate ken.
Partikular detang e na migulape,
Sobra kayna uli ning sakit dang tagle;
Ba’lang mibual, imbes king yan itikdo re
Keng pangasubsub na, balausanan da ne;
Ding salunan, maina’t e na migulape
Ken pang dalan alus mimin do’ng pemate
Alang lunus detang misusub pane
A sundalus tamung taguri – USAFFE.
E mu yan ing kasangilan a gewa ra
Ding Hapones iniang panaun ning giera;
Subali king liklak da’ing egana-gana,
Pati kababaynan lepastanganan da;
A nu’ kanita pa ding ken king Candaba,
A lesak da puri king kalulung bie ra,
Angga king mete la keng kapapanaya
E mirinan pansin ing para karela.
At maging ding dakal a mibual Bataan
Ampon aliwa pang mete king labanan,
Ila ring kapurit mang ‘back pay’ dang ausan
Ilang e mikalmang tinanggap, midinan;
Kabang ding e biasa mang king armas talan,
Ila retang memag-pension bulan-bulan;
(O ing gubyernu yang ating kakulangan
Inia mangibabo ing antimo kanian?!)
