Karas keng ganaka ampon kababan lub
ala nang mibas pa mekad kening Piyuk,
Inya naman kening alang matiribus
a keyang esposa maglupa yang buguk.
Madalas pati na obra king kusina,
ining Piyuk ya’ pa rugu ing gagawa;
Pero kaya e mu damdaman bitasa
ing sumabi uli ning malam yang bina.
Pati na aliwang bage king bale ra
kang Piyuk na pa yalig ning keyang asawa,
Nung inya marahil misan aisip na
ing sungalan ne’yti kabud kinatmu ya.
I Piyuk makanyan deng kalulunusan
ding keyang kumpare at kakaluguran,
Inya naman iti tistus de nyang misan
a nung makananu ne ngarang pasdalan.
“Padre,” nganing metung, “malulunus kami
rugu keka inya mu asabi mi ngeni,
Ing sana e balang buri nang Kumare,
pamintuan mu ba’yang e maglumo iti”
“O pare” ngana pang anting magparagas,
makanyan pin inya e na ke madalas
mipapate – kase itang e na kapad –
ya ing gagawan ku at pamatad oras;
E na buri niti ing ya ing mamipi,
inya aku na ing sisiasat, pipipi;
At king aliwa pang bage e na buri,
yaku naman pati pamanese nasi;
Pero nung kaibat ku rugung memlantsa,
aku pang mamipi pihu keng mikontra;
Uling e ku bisang mapasma, at saka
lunto ing balamu ‘under’ ku pin kaya”!
Glossary:
Alang matiribus – bolang, luse, turak
Malam – maganaka, mapagpasensya
Bitasa – pihu, siguradu, misan man
Tistus – sibung, tiru ban lumaban.
Magparagas – magmayabang, magpangaya
Mipapate – mikokontra, mibubungil
Sisiasat – lilingun, sisikasu, gagawa
Pamanese – tutun nasi, maglutu
Yalig – yasa, panibala, pagawa
Sungalan – kontran, patasan, e pamintuan
Pasdalan – daragan, ban madala, e ulitan
Maglumo – mamiasa, asanayan
E kapad – e buri, e tula, kasaman, e pkasaban
Pamatad oras – libangan, peka panawa
Rugu – ‘a term used to show humbleness’
Lunto – mayakit, masubuk, mipatunayan~!
