Metung ya’y Piyuk karing bansag da mebalu
a mabie ngara pin ding minunang tau;
Atin yang anak a magbabaintau
a keyang dirinan sapat a sustentu.
Misan, ngana “Junior wayni ining cheki
a pamayad ‘tuition’mu keng bulan a’y iti;
Sabyan mu kang Ima mu yapin na’ing tauli
karing ‘allowance’ mu a babie ku ‘monthly’
Antining disyotsu anyos na ka idad,
keta pang adyes ya bulan a milabas;
Inya keng biling yan, ala na kung dapat
pakibatan pa keng ‘schooling’ mu anak.
Pero lon mia murin a ‘facial expression’
kaybat mung sinabi a ing kekang ‘tuition,’
Keng tutuki ali ku ne obligasyon,
king ba’kung abalu ing ibie nang rason”
Inya ining Junior karas na karela
agad nang sinabi iti kang Ima na,
King ini ping cheki a binye ning tata,
‘last’ ne uling e ne ‘minor’ ing anak da.
Nung makanyan ngana naman nining Ima
a e sinlam lupa ditman o migbotua,
“Balikan me bukas, sabyan mu e ku mua
salamat ngamu keng sobra nang ganaka.
Keng pamagaral mu pigastusan na ka
agyang e tutu ing ika ing tata na,
Kaybat lon mia murin ‘expression’ a lupa,
nung keng pasabi ku e mibural mata!”
(Aba, agyang kenung lalaki mu sabyan
ing antiting bage a e na ukulan,
Aliwa pala ing Tata, e mibural
a mata, at mekad matda panimanman?
Iting mesaglawe bunga niang panyulat
ning poetang sable bakud ngaring tanak,
Ban kapurit mu man, iti makayaplak
at mie kapainawan king balisa utak.
Sisti mu, ngara pin ding mapamatula
iting aisip kung sinulat a paksa,
At nung atin ku mang rugung asagasa
aduan ku – ila nang balang manupaya.
Dakal a makanyan, a mangapalyari
lalu karing Adan a mapag-babayi,
A nung nu’ e yamu metung a babai,
ing pugad da inya – iti malilyari.
King kenu mang taung misan daratangan
ning lungkut, king agyang e mamroblema yan,
Kalupa ning magdili-diling tuknangan,
a’yalang kalukup bitasa nanu man.
Glossary:
Mebalung mabie – ‘separated, single parent’
Rason – sangkan, dahilan keng tagalog
Migbotua – migsabi-sabi, mimua
Ngamu – sabian mu, pakibat mu.
Matda – mag-mate, mabungsul, milako male
Panimanman – panlalawe, panakit
Ukulan – isipan, babalakan
Agyang kenu – agyang ninu).
