Anak ku pa dimdam ku na, karing minunang makatua
A ing PELCO nukarin man, a distritu ning Pampanga
E ya istablisimientu, o maragul a kumpanya
At e ya banding gubyernu, nun’e koperatiba ya.
Nung makanian iti pala, e ne bandi ning gubyernu
O ninu man a makualtang negosyanti kekatamu
Obat e la makinabang, ding menasa karing miembru
Nun’e den mung manibala, kambe ra ring empleyadu.
E wari ing peka-sangkan, king pangatatag na niti
Ban kanita e makaying, mitas singil king kuryenti
Dapot nung surian ta’ rugu, ining tune malilyari
Ding miembru ilang mamusan, mamayad king pangalugi.
Samantalang ding direktor, ampon ding talapagobra
Atin lang pribilehiyung, karelang atatamasa
Agiang katambak la utang, king kuryenting agamit da
E ro basta pupututan, dasan naman ning pabanwa.
Karing miyembru tambing da lang, pupututan a kuryenti
Karas na ning takdang oras, a pamamayad kaniti
Makasara la balugbug, karing taung makisabi
At ustung pepatuglung de, atin pang “RECONNECTION FEE”.
Bilang miembru atin tamung, karapatan ban mangutang
King aguman nung nanu la, ring kekatang pakinabang
Pati kwenta nung magkanu, king kilub na ning pabulan
O pabanwa, ring linub a pera tamung penakitan.
Dapot ilang makabalu, karing anggang aktibidad
Na niting koperatibang, ding masa ring mitalakad
Potang ating pangalugi, kekatamu ra pabayad
Mumuna ya pa ing late, king saplid a mipnu kaplas.
Makapakayli neng misan, itang karelang diskarti
Patik-patik pa ing uran, patdan da na ing kuryenti
Makakamas, lakuas na nung, kasalungsungan mung mayli
King palabas a alben mu ketang NETFLIX ampon TV.
Ustu namang atin bagyu, karin la e makamatdâ
Agad kuryenti, bista’t man, dakal nong posting miragsâ
Patda sindi pa ing sulu, a maralas makasirâ
Karing “appliances “ inia, no karakal ding sasamâ.
Ding Direktor na ning PELCO, oren ta’no miyalilan
Iniang Hunyu a disiotsu, king merapat a alalan.
Magkang metung mu man karen, e tamu apanaligan;
Ding malapit king kalderu ila retang miyulingan.
Pamalak ku panaun na, king ban pakibaluan tamu
Ing dibidendu ampo pang miayaliwang benepisyu;
Dapat maging itang “by laws”, ipakit de karing miembru,
Ing “financial statement” at aliwa pang dokumentu.
Kooperatiba ya’ing PELCO, e ne bandi ning ninu man
A kapitalista keti lalawigan Kapampangan,
Iniasa’t itamung miembru, ita’ mismu keng biling yan,
Ing tune maki-bandi at empleyadu la ring tatalan.
Atin tamung ‘legal basis’ ikutang nu’la miraras
Ding panakitan ning PELCO, kilub ding banuang milabas,
A e la mu milyones den, nun’e bilyons na la mekad,
Umpisa king iti meging kooperatiba ya’t sukat?
Nanu pa ing ulaga ring direktor a milulukluk
King aguman, nung ding miembru, e ro agyung pakipamuk,
A nung wari sa ketang “TEKS”, ita ing lalto pambuluk?
Kapilan man ala tamung, pag-asa rugung sumambut…~
Vhelle V. Garcia
June 20, 2022
UAE
