(Malukang ampang kang Don Jose Abad
Santos para king Aldo nang Kematayan)
King agya mang milabas na ing aldo nang kematayan,
Jose Basco Abad Santos, ning kekatang lalawigan,
Bilang pamangilala king mapuri nang bie delanan
Antimong pun ning justisya’t megig galame mu naman
Ning gubyernu – inyang matdas ing kanita ‘II World War,’
A mig- ‘retreat’ ya i Quezon, i Abad Santos yang melakuan.
Maniaman man ing taluki kang Quezon king Australia,
Pero e na bitasa mang pengilag ing sarili na
Karing lilung Hapones ing kararasan na karela,
Nu’ne ing matapang a Don e na binalak man keta
Ing tumakas busal na ning kanita mapaling gyera,
Uling e na arapat ing king balayan painggulut ya.
At iti ing buri tamung king isip da ring memalen
Pibulayan ing lugud na ning mapuri tang kabalen
King bansang keyang santungan at king beitan nang balen;
Teya na ing solung bie na king simpling parapat da ken
Ding Hapon a mekabihag, keya ing ya e re paten,
Mabisa ya sang’ sumaup keng pamangubyernu da ren.
Pipiling ya i Don Jose king abluk dang tangu ya sa’
Ibulus de at yabe keng karelang pamamahala,
Dapot masyas nang pekibat ing taganang e ya bisa;
Makanian deng pikapalian mekad ding keya mepika;
Inya ketang oras a ita, ing sentensyang ya ‘idagsa’
De ring Hapon king Malabang, Lanao, iti e mikabla.
Pero bayu re berilan agpang king metung nang anak
A kayabe nang kilung da reting Imperyalistang Jap,
Deti pepangadian da’la at dinyan ditak a oras
Ban misabi ring mitata – dapot “Kura, Kura” agad
Ing keta midadapitun deting Hapon da gilisak,
At keta tinaid da ne nung nu’ ing atul, meganap!
Mikaksing ing asna sikan a katni ring keya tinud
A mikakalukung balas king katawan na memusbus
Kabang karing Hapon ing Don alang gewang e makatud;
A sukat niting pagdusan nu’ne ing ya e ria’yabluk
Manib king kapamalan da, ding anti ren a’yalang Dios
At masangil karing taung karen e bisang pasakup.
Nanung meging kasalanan nang Don Sesing karing Hapon,
Baket keya gewa ra ing pete re’t bildug king aun
King uli namu ning iti e bisang makisanmetung
Keng kaburian ding e tamu kabalen man o ka-nasyon?
(Atin tamung sarili bie at yalal bilang peka-pun
Inya agyang kang ‘Uncle Sam’ e tamu dapat pakaul).
Mibalik pa kaya itang agyang kaputut yang ulas
Piabayan deng king katawan ding mangalgal tang kapatad
Panakap da ban king dimla, iti makabawas ditak?
Ngening iting pagka-rinan tamung yatu, ditak-ditak
Anti ra neng banding tune ding palipi nang Satanas,
Nung nu’ ring dakal kareti pulitiku la’t ‘oligarch’?
A magkukunwari mu ken a malugud king balayan
At karing ka-Pilipinu deti ating lang masabal?
Tabalu mu nung atin pang keti labuad Kapampangan
Mibait a kalupa ning bayani tang parangalan
A biryan na ing mate ya gamat ding mapanalipan
Kesa king painggulutan ne ing keyang balen a tibuan.
At ngeni king pulayi ning marinat a pulitika
A mistula nang negosyong keti pisasamsaman da
Ding ken bansag tamu ‘trapo’ ampo pa ring bayung salta,
Atin pa king aldo bukas lunto keti king Pampanga,
A kapara nang Don Jose, itaya ing solung bie na
Para king Indu tang Balen? TABALU MU NUNG ATIN PA!
(Ngening oyan mayayakit, mas mangibabo ing pera)
