Antining e na la ditac ding mangutang
Inggil caring keca’tamung Sabing menan,
a e ra na balu man a kabaldugan
ding aliwang sobra ngara pangalalam?
Ing tutu, e na la binang magagamit
iniasa’t keraclan caring bayung bait
e ra nala balu salitang mewaglit
uling e mipunla king carelang isip.
E anti canitang ing lenguahe tamu
a malilingap ya’t masise ustu,
keti sentral Luzon, ing mal tang amanu
ya ing salita ra menasa ring tau.
Ing Cabiao at Gapan na ning Nueva Ecija
Capampangan alus ing ken salita ra;
San Miguel, Bulacan, atimurin keta,
ing amanu tamu yang gagamitan da.
Dane albugan ning Lubao, ken Bataan
ing salita ra Capampangan mu naman,
Tarlac angga Mauli na ning Pangasinan
Antimurin ing kecatang Sabing menan.
Lalu cabulditan ning balen Apalit
a’yala’t aliwa nung e ing Calumpit,
ing salitang tibuan ya ing magagamit
keraclan, at sabing tagalog dusuldit.
Ating cuentu inggil caring magcumpadre
a manasan lalam na mismu ning tete
ning Sulipan at nu’ining keni dane
ning Apalit tau ya’yti Macabebe.
“Pare ko,” ngani ning tau king Calumpit
“ang nakuha ko sa aking pagsisid
ay tulya lang – ikaw anong ‘yong nadagit?
“Pare, parus-paus ampo mung balibid”!
“Tumon na ka” ngana ning tau Calumpit.
“Migbacal kung nasi,” nganing ken Apalit.
“Anong baon mong ulam?” nganing ken sumangid.
“Parus-parus,’ la mu at saka balibid!”
‘Pagsaluhan na lang natin ang huli mo
at ang akin para matikman ang iyo”
nganing ken Calumpit nandin albug-alto
aplit susungab keng ilug ning Maysulo.
At niang yapag na la misdan ya’ing Tagalug
karing ikit nang keng plastic macabalut.
Tulya lang sigang na keng tulud sampaluk,
Nung inia anti ya waring mipakirut.
Obat e la pin mo masdan dening adua
ngening deti rugung abitasa,
king ing tulya at parus-parus, ika nga
ay iisa pala at maling akala.
Antimurin pala ing ausan dang ebun
keti kekatamu, ‘na ang tawag ibon,
lumilipad ito at di gaya nitong
ang ‘ebun’ ay itlog (nga ng di panabong)
Lon mo reting aduang misisiping balen
ning Apalit, at saka ning Calumpit ken,
makapagmulalang misisiping la ren
pero maragul ing atyu pilatan den!
(Atin yang casuglung)
