I PISUK bistaman tiktak ya katsura
Dakal a babaing makiburi keya
At uli ning medyu makapal ya bulsa
Malagua nang akua pati talasawa.
Pero king agya mang lupa yang butuki
E na la ditak ding keyang apatuki;
Ing keyang asawang malagu’t maputi,
Keng rigalu’t pera ikua neng asali.
Nanu pata ala neng sukat payntunan
I Pisuk keng bie na nung pitutuliran
Pablasang bukud king ala yang liliwan,
Asne pin kaseksi asawa nang hirang.
Ing pintas ku mu keng kabilyan nang Pisuk,
Ander de saya ya king asawang irug;
Nung atyu keng dalan damdaman nyang masyut,
Mikapulayi yang papanik ing dyablus.
Makanyan man, uling bisyu na talaga
Ing pamagbabai makatakas ya pa,
At keng biglang liko karin no’ darala
Deng babaing di-‘date’ na kaibat megobra.
Misan, maranun yang linuslus i Misis
At i Pisuk naman e lulub neng Biernis;
Keng kaligaga nang mako makipag-‘date’
Marapal yang meko, maybug mangatakid.
King pisabing oras at otel nung nu’la
Mig-‘check-in’ ding adwa masayang menik la;
Dapot ining Pisuk king ‘hall-way’ karas da,
Mipayatras ya’yti king bage ikit na.
Sakildap migpampan ya’yti kagulutan
Ning babaing abe nang menik king eran,
Inya ngana niti, kang Pisuk kinutang:
“Obat balamu yang mekakit kang aswang?”
“Ing Misis ku itang kalual-alual pamu
Keng kuartu nung inya bigla kung dinuku;
Ose map pin e ya masala ing sulu,
Nung ali pihu kung takman palu-palu!
(Ay rugu, uli ning pangataranta na
At alang aisip ketang oras a ita,
Nun’e ing salikut – ing milyari wayta
Ya pa ing mengilag king kayang asawa.
Inya asabi ta’ng e ya linto muting
Nun’e pindeu yang mistula ngara pin,
Uling mebistu nang e mu yang sisiping
King keyang asawa – nang’ gewa ning mesling?!)
