I Pentung karas keng pamaninum alak
katukayu ra ne ding ngara pin mekad
makabau ya pang tansan, ta’ne agad
lalasing at e na diretsung magkalakad.
Ing dalan king agyang sementadu ya’yti
antiamong ‘rough road’ king pikbungan ning alti,
neng yan aslu-menus kalakad yang bibi
potang mipasobra ing ainum niti.
Agya mang anad ne ing kayang asawa
king anti kaniting matsurang bisyu na,
misan, uli nitang katmu ne talaga,
pengamanwan na ne king maling asal na.
“E ra ka babawal, maki’numan Pentung
pero sana e ka dayukduk keng inum,
at e uling keka atin mung pepaynum,
sagaran mu agyang iti patingapun.
Ngaku wari keka, king buri kung sabyan
e na ka man sana makipag-sabayan,
anti na ning ika malagua kang tablan,
e ka dalukduk nang dalukduk makanian.
E ku buri itang lalto kang pikalian,
potang sobra na lasing, balu mu yan.
Pamisan-misan ken manekas na ka man
ba’kang e malaguang lasing keng inuman”.
“O makanian ku pin lalung malalasing
king anti kanian a kekang panabilin.
E wari napun pa sinabi mu na pin
iting amanwan mung madalas ibilin?
Ala kung kelinguan kapurit man darling,
karing sinabi mu at sinitsit nandin.
Tiparan ku naman at dininan pansin
nung inia lalu kung mengaduling-duling!”
“O bakit naman mo melasing ka Pentung
nung ing penabilin ku keka keng inum
gewa mu talaga ba’kang e migumun?”
“Aba, ikit mu na…’nang milyari napun?
Uling tinekas ku pati na rin mirun,
a mapad mu naman keng libri ing inum,
keng pakiramdam ku ing gabun mumugun
kabang maglakad ku babo ning tarundun”.
“Imposible naman Pentung ing lasing ka,
nung ing sinabi ku gewa mu talaga?”
“Aba, yang gewa ku… manwala’t ali ka”,
nganing pekibat na king keyang asawa.
Balu mo, ba’ra ping e apansin ita,
ing aku pin deti panekasan ku la;
balang ating tikdo munta king kubeta,
pasalikut king inuman ing karela!”
